GIF-p siulittaasua sassassanngilaq: Angutit marluk siulittaasunngorniutissapput

Maanna erseqqissumik nalunaallivoq, Kalaallit Nunaanni Timersoqatigiiffiit Kattuffianni qaammatini tallimani kingullerni siulittaasuugallartoq, Bolethe Stenskov sassarnissaminik pilersaaruteqanngitsoq:

- Assut nuannerpoq kattuffimmut siulittaasuuneq, tamaattorli Kommune Kujallermi timersornermut peqatigiiffilerinermullu siunnersortitut atorfininnikuuninnut atatillugu Narsamiit Qaqortumut nuuttussanngorpugut. Suliffigilikkannut atatillugu suliassarpassuaqarpunga, taamaammat suliffiga annertuumik aallukkusuppara, Bolethe Stenskov Sermitsiaq.AG-mut oqaluttuarpoq.

Kattuffik qimassanngilaa

Sassartussaanngikkaluarlunili timersoqatigiiffiit kattuffiat qimassamaanngilaa. Tassami siulittaasuugallartutut inissinnini sioqqullugu siulittaasup tulliatut inissisimavoq, tassungalu uteqqissamaarpoq, tamatumalu saniatigut aamma Arctic Sportimi siulittaasutut suliaminik nangitsisussaavoq.

- Ataasiarluni timersortulerineq - ataavartumik timersortulerininnguuttarpoq. Timersortartortatsinnik aallussineq kajumissutsimik sulineruvoq, tamannalu nuannertuaannartuuvoq, taamaammat aamma kajumissutsimik sulinermut nangittumik peqataassaanga. Qaammatini taakkunani tallimani siulittaasutut issianinni, annertuumik angusaqarpugut. Assersuutigiinnarlugu nunatsinni timersortarfiit timersornermullu atortorissaarutit sukumiisumik misissuiffigineqartussanngorput, misissuinerillu tunngavigalugit pilersaarusiortoqassaaq timersortarfiit timersornermullu atortorissaarutit nutarsarneqarsinnaasut nutarsarnissaat nutaanillu taarsertariallit taarsersornissaat pillugit pilersaarusiortoqarumaarpoq, assersuutigiinnarlugu timersortarfiit nutaat piffissamullu naleqquttut ilaatigut pineqartussaassapput.

Bolethe Stenskov qulanngivippoq timersornermut timersortartunullu siunissaq nunatsinni qaamasuusoq, imaaginnanngitsoq timersoqatigiiffiit kattuffiata ataani timersoqatigiiffiit siuariartorrannerat, kisiannili aamma nunatsinni timersornerup siunissaqarluarnissaanik qulakkeerinninniarnermi politikkikkut piumassuseqarluartoqarmat.

Angutit marluk siulittaasunngorniutissapput

Stenskov oqaluttuarpoq siulittaasussatut sassartut marluk akornanni ataaseq siulittaasunngorumaartoq, angutimmi timersornerup iluani ilisimasarineqarluartut marluk siulittaasussatut sassarmata.

Siulleq tassaavoq Claus Nielsen, taanna siusinnerusukkut timersoqatigiiffiit kattuffianni allattaanerusimavoq, tamatumalu saniatigut siusinnerusukkut Team Greenlandimi maanna Elite Sport Greenlanditut ilisimasatsinni allaffeqarfimmi pisortaasimavoq.

Aappaa tassaavoq Frederik Lundblad, ukiorpassuarni ASP Aasiaat sinnerlugu pingaartumik sisoraatinik arpattartutut ilisimaneqarpoq, maanna taanna Nuummi najugaqarpoq Kommuneqarfik Sermersuumi qaffasissumik atorfeqarluni taamatuttaaq politiitut ilinniarsimasuuvoq.

Bolethe Stenskov siulittaasunngorumaartumut taakku arlaannut siunnersuutitsialaqarpoq:

- Sumiiffinni timersoqatigiiffiit soqutigalugit malinnaaffigigigit. Sumiiffinni timersorneq kajumissutsimik annertuumik suliaavoq nukiillu sumiiffinni atorfissaqartinneqarluartarput timersorneq ingerlalluarsinnaaqqulugu, taakku piffissarujussuaq atortarpaat, pingaarnertullu suliarisarpaat timersortartortamik ajunngitsumik atugaqarlutik timersorsinnaanissaat qulakkeerniartarlugu. Kajumissutsiminnik suliaqartartut aammalu timersornermik ingerlataqartartut ineriartorluarnissaminnut pisariaqartippaat tapersersorneqarnermik misigisimaneq tusaaneqarnerlu, Stenskov oqarpoq nangillunilu:

- Aamma neriuutigilluinnarpara siulittaasunngorumaartup Aalasa 2030 (Nunarsuarmi nuna timimik aalatitsiffiunerpaasoq) tamakkiisumik peqataaffigalugulu tapersersorumaaraa. Anguniagaq sulissutigisarlu taanna pingaaruteqartorujussuuvoq, taannalu suliniut timersortartunuinnaq tunnganngilaq inuiaqatigiinnili innuttaasunut tamanut saaffiginnittuulluni, GIF-mi siulittaasuugallartoq, Bolethe Stenskov tallimanngornermi taartissaminut suliaminik tunniussissamaartoq oqarpoq.