håndbold-GM
GM-imit assit: Ataqatigiinneq annertuumik GSS-imut pingaaruteqartoq
GSS-ip arnartai angutitatik assigalugit ukiut tallimat ingerlatiinarlugit GM-imi pissartanngorput. Inernerit assillu takukkit
Assammik arsarluni GM-imi pissartanngorniunnermi GSS-ip arnartaat NÛK-mut unammimmata unammineq naallugu pissanganarpoq. GSS-imi paarlaasugissaarneruneq pissutaalluni ajugaaniutivinnermi 20-17-mik ajugaapput, muminnermi 10-11-mik kinguaqqallutik.
Assammik arsartartut misilittagartuut NÛK GSS-imut akiuullualaavipput.
Sungiusarneq
- NÛK ukiumi unammisaqattaarfiusumi siuariartuinnavipput, tamanna nersugassaavoq, GSS-ip sungiusaasua Johannes Groth Sermitsiaq.AG-mut oqarpoq.
GSS-ip arnartaat ukiut tallimat kingulliit pissartaapput, ukiut kingulliit pingasut Johannes Groth sungiusaasoralugu.
- Assammik arsarnermi periaatsit sungiusariaatsillu aalajangersimasut atorneqarnissaat sungiusaasunngorama pingaartissimavara. Illersuinermi saassussinermilu isumaqatigiissutaasimasut atorlugit unammisarpugut, Johannes Groth oqarpoq.
Arsaqataasut ataqatigiilluarsimasut oqaatigaa.
- GSS-ip arnartai ataqatigiilluartorujussuupput, tamannalu pingaaruteqaqaaq. Arsartunut piumasaqaateqarnikuuvunga, tassa sungiusarfissani tamani takkuttarnissaat piumasarinikuugakku, taamaaliorunillu aatsaat GM-imut peqataasinnaasut oqarfigalugit. Sapaatip akunneranut pingasoriarluta sungiusartarpugut, sungiusarnerullu avataatigut aamma timigissartoqartarluni, Johannes Groth oqarpoq.
Misigisaq nuannersoq
GSS-ip NÛK-llu pissartanngorniullutik unammineranni Inussivimmi illersuisut tusaaneqarluarsinnaalluarput.
- Arsartukka oqarfigaakka unammineq nuannersumik tigussagaat. Inussivimmi pissartanngorniuttoqarnera misigisaavoq annertooq, Johannes Groth oqaluttuarpoq.
Sapaammi angusat:
QNQ – Norsaq HC (angutit) 5-nngorniuttut 27-31 (11-15)
SAK – Nagdlúnguak (arnat) bronzennanniuttut 47-19 (22-14)
SAK – NÛK (angutit) bronzennanniuttut 23-18 (9-9)
GSS – NÛK (arnat) pissartanngorniuttut 20-17 (10-11)
GSS – Nagdlúnguak (angutit) pissartanngorniuttut 39-28 (20-12)
Assit ataani takukkit