Håndboldskole iluatsilluartoq: Sisimiuni assammik arsartartut nutaarpassuit
Sisimiuni assammik arsarnermut atuartitsineq qaqugukkut pissanersoq eqqoqqissaarsimavaat - tassalu meeqqat feriareerlutik angerlararnerisa kingorna pisussanngortissimagamikku. Taamak aaqqissuussineq SAK-p iluatsilluarpaa, ilaasortammi ikiliartoruttortut amerliartoqqilersinneqarput.
Oline Johansen Silassen, ukioq manna meeqqanut assammik arsarnermik atuartitsinermik aaqqissuisuusut ataqatigiissaarisuat nuannaarpoq:
- Meeqqat 70-it missaanniittut assammik arsarnermut atuaqataapput, aaqqissuussinermullu piffissaq eqqorluaavissimavarput. Tassami meeqqat tamarluinnangajammik håndboldertalerput, tassunga pissutaavoq meeqqat atuanngiffeqareerlutik angerlakaanerannut utaqqinikuugatta, piffissarlu taannarpiaq iluatsillugu timersortarfik aasaanerani matoqqareerluni ammarluni.
Tamannarpiarlu iluatsilluarpoq.
- Meeqqat arlalissuit nutaat assammik arsarnermik aallutaqalerput, Oline Johansen Silassen Sermitsiaq.AG-mut oqaluttuarpoq.
Ikiliartornermiit amerliartoqqilernermut
Sisimiuni ukiuni arlalinni meeqqat assammik arsartartut ikiartuinnavissimagaluarput, taamaalillunilu U8, U10 aammalu U12-imi meeqqat ikippallaartarsimallutik. Maannali assammik arsarnermut atuartitsineq augustip 17.-ianiit 20.-iat ilanngullugu ingerlanneqaqqammertoq iluatsilluarsimangaarmat ilaasortat amerliartoqqilersimapput:
- Assut nuannaarpugut aallarterlaat taamak amerlatigimmata, tamanna assut isumalluarnarpoq, tassami ilaasortat timersortartut ikiliartorsimagaluartut, maanna mumisinneqarluni amerliartoqqilerput, taamaammat meeqqat nuannaarlutik sungiusarnissaminnut qilanaartut isigalugit misigisaavoq assut nuannersoq, Oline Johansen Silassen oqaluttuarpoq.
Attassiinnarnissaat pingaaruteqarpoq
Oline Johansen Silassen oqaluttuarpoq, pingaartumik meeqqat mikinerit assammik arsarnermik ilinniarneranni angajoqqaavi aanakkuilu annertuumik tapersersuisimasut, taassumalu neriuutigaa tapersersuineq taanna attatiinnarneqassasoq, taamaattoqarneratigummi meeqqat assammik arsarnermik aallutaqaannarnissaminnut kajumissuseqarnerussammata.
- Assut nuannaarutigaarput angajoqqaat aanakkullu tapersersuilluarsimammata meeqqat assammik arsarnermik ilinniarneranni, allaammi angajoqqaat aanakkullu ilaat klubbimi kajumissutsiminnik suleqataalereerput. Neriuppugut tapersersuineq annertooq misigisarput attatiinnarneqassasoq, taamaalilluta aamma assammik arsartartut kinguaariit arlallit inuttassaqarluartullu klubbitsinni assammik arsartartuunissaat ingerlassinnaaniassagatsigu, Oline Johansen Silassen, assammi arsarnermut ilinniartitsinermi ataqatigiissaaralunilu aaqqissuinermi akisussaasuusimasoq naggataatigut oqarpoq.
Sungiusaasut Arkaluk Silassen aamma Felix Silassen sungiusaanermik ingerlatsisuupput, taakkulu ikiortigaat, Kaj-Peter Brummerstedt, Aqqalooraq O.Silasen, Nivi Silassen aammalu Erik Jensen.
Maja Skovgaard Motzfeldt aamma Isak Skovgaard Motzfeldt, tamarmik SAK-mi assammik arsartartuusut oqaluttuartuupput meeraanermiit inersimasunngornermut assammik arsartartuuneq pillugu.