HC Fyn akiliisinnaajunnaarpoq
HC Fyn ippassaq tunniutiinnarpoq. Tamanna Minik Dahl Høeghip Jakob Larsenillu tupiginngilaat
HC Fynimi aqutsisut klubbip ingerlaqqinnissaanut aningaasanik pisariaqartitaminnik pissarsiornerminni nakkaannarput. Maannakkorpiaq 400.000 koruunit pissarsiarisussaavaat sulilu siunissami amerlanerungaartut klubbi ataannassappat.
Minik Dahl Høegh aamma Jakob Larsen taama aalajangiinermut tupaallattorsuunngillat. Qangalili ilisimasimavaat klubbi ataannassappat immikkut ittumik pisoqartariaqartoq.
Arsartartut marsip naanerani akissarsiassatik suli tigusimanngilaat. Maannakkullu Spillerforeningen imaluunniit Lønmodtagernes Garantifond aalajangiisussaapput HC Fyn akiliisinnaajunnaartutut nalunaarutigineqassanersoq.
Kalaallit arsartartut soorunami pakatsisimapput. Takorluukkat annertusimaqaat Faaborg HK aamma Odense Håndbold uumap arsarfiup aallartinnginnerani HC Fynimut kattummata. Anguniakkat ilagisimavaat upernaakkut 2013-mi Håndboldligamut anngunnissaq.
Aappassaa Minik Dahl Høegh Jakob Larsenilu klubbimut aningaasatigut ajornartorsiortumut attuumassueqarput. Marluullutik GOG-miissimapput, Fynilli kujataani klubbi ukiut marluk matuma siornagut aamma akiliisinnaajunnaarpoq.