Ilaat utoqqaavallaartut ilaat inuusuppallaarput
Nerrivimmi arsaarartartut Arctic Winter Gameseqataasussanik toqqaaqqissapput, toqqagaagaluartut arfinillit akuerineqarsinnaanngimmata.
Timersoqatigiiffiit Kattuffiata allattaa Claus Nielsen Sermitsiamut oqarpoq, nerrivimmi arsaarartartut peqataasussatut tikkuarneqarsimasut ilaat arfinillit ukiunik killiliinermut piumasaqaatinik naammassinnissimanngitsut.
– Arctic Winter Gamesimut malittarisassat malillugit ilaat pingasut utoqqaavallaarput Timersoqatigiiffiillu Kattuffiata malittarisassai malillugit allat pingasut aamma inuusuppallaarput, Claus Nielsen oqarpoq.
– Timersortartut peqatigiiffii Artic Winter Gamesimut peqataatitaqartartut tamarmik ukiarmi ataatsimiinnermi malittarisassanik agguarneqarnikuupput. Taamaattumik ukiut killissaat ilisimavaat, Claus Nielsen nassuiaavoq.
Nerrivimmi arsaarartartut kattuffiata GBTF-ip tikkuaanermi kukkusoqarsimanera Sermitsiamut nassuerutigaa.
– Ilumoorpoq malittarisassanik ukiarmi tunineqarnikuugatta taakkulu uagut taamanikkut sungiusaasuunerisatsinnut tunniunnikuuagut, GBTF-ip siulittaasua Sivert Lynge Sermitsiamut oqarpoq.
Annerusumik atuarsinnaavutit Sermitsiami tallimanngornermi saqqummersumi.