Iluatsitsiinnakaseqaaq
Aputsiaq Fleischer Høy indianerit pinnguaataanni Finger Pullimi bronzennappoq. Ulluni 14-iinnarni sungiusarsimavaa
Indianerit pinnguaataanni unamminerit ilagaat Finger Pull. Imaluunniit noqqoruunnermik taasakkatsinni. Taamaaliussagaanni nukittuujusariaqarpoq teknikkerilluni minnerunngitsumillu inussatigut nukittulluni. Nuummiit Aputsiaq Fleischer siullermeerluni peqataavoq, allalu peqataasinnaanngitsoq taarserlugu peqataalluni noqqoruunnermik ilisimasaqanngivilluni.
Aputsiaq Fleischer Høy angutaavoq pillagunartoq. Noqqoruunnermilu ajornartorsiuteqarani. Taamaallaat piffissakilluni immikkut ittumik sungiusangaatsiartariaqarsimavoq.
- Nuanneqaaq. Pingasut siulliit unammereerlugit isumaqarpunga ajornanngitsuusoq. Ajugaanissara ajornartorsiutiginngilara isumaqarlungalu nukittunerullunga. Tamanna imminut tatigilissutigvaara isumaqalersimallungalu ujaminnassinnaallunga, ajornanngippat kuultimik, qungujulajuaannartoq Aputsiaq Fleischer Høy Sermitsiaq.AG-mut oqarpoq.
Unammisarnili nukittoriartortillugit qungujulajunnaariartorpoq Aputsiarlu ingerlaqqissaguni ilungersortariaqarluni. Naggataagut nukittunerpaanut unammivoq. Katillugit arfinileriarluni noqqoruuppoq. Unamminerni kingullermi marlunni Aputsiaq Fleischer Høy ajorsarpoq taamaalilluni bronzennanneq naammagisariaqarlugu.
Ajugaasuuvoq Mario Rupert Nunavimmeespq. Aamma inuuissiorpoq – inuuimminilu pitsaanerusumik tunissusisisinnaagunanngilaq. Silvinnattuuvoq Edua Jones aamma Nunavimmeersoq.