Inuusuttut arfinillit angalanissaminnut toqqarneqartut
Nunani Avannarlerni Piorsarsimassutsikkut Attaveqaat (NAPA), aappaagu Alaskami Arctic Winter Gamesertoqarnerani Kalaallit Nunaata kulturikkut takutitassaanut takutitsisussanik, inuusuttunik arfinilinnik nutaaliortunik toqqaavoq.
Inuusuttut arfinillit nalilersorneqareerlutik 2024-mi AWG-mut kulturikkut takutitassamut toqqagaasut puigunaatsumik misigisaqartussanngorput. Alaskamut angalanerup saniatigut, inuusuttut Islandimut Savalimmiunullu angalassapput, ukioqatigisaminnik taakkunani naapitsissallutik.
NAPA septemberimi Tasiilamiippoq, Arctic Winter Gamesip kulturikkut pilersaarutaanut inuusuttunik piginnaanilinnik neriunaatilinnillu nassaarniarluni. Takutitsilluni misilitsinnermut 21-t peqataapput. Tamatuma kingorna nuna tamakkerlugu inuusuttut tamarmik digitalikkut misilitsinnissaminnut periarfissaqalerput.
Pikkorissorpassuit
- Auditionerlutik videonik nassiussisut ikigisassaanngeqaat, assut tuppallernarpoq.
Misinnarpoq inuusuttut tupinnaannartumik pikkorissorsuit peqataanialersut.
Amerlanerit aallartissinnaarusukkaluarpavut, Kuluk Helms, AWG-mut kulturimut ilanngussassami ilitsersuisoq, tusagassiuutinut nalunaarummi oqarpoq.
Inuusuttut toqqarneqartut tassaapput:
- Hans Karlsen Kullorsuarmiit
- Petra Bidstrup Kullorsuarmiit
- Louisa Ignatiussen Tasiilamiit
- Poul-Erik Kristiansen Tasiilamiit
- Qarsoq Rasmussen Nuummiit
- Aviaaja Korneliussen Nuummiit
Nunatsinnit kulturimik suliaqarlutik aallartitat Alaskameereerunik Island Savalimmiullu tikissavaat, taakkunani inuusuttut allat nunanit allaneersut naapinneqassallutik.
Atorfeqarnikkut siuarsaaneq
- Nuannaarpugut taamatut inuusuttunik periarfissiisinnaagatta. Misilittakkatta takutippaat, Arctic Winter Gamesimi kulturikkut sammisaqartitsinernut peqataasarsimasut
ilai kulturilerinerup silarsuaani inuussutissarsiuteqalertartut. Inuusuttunut
periarfisseeqataaneq suliatta pingaarnersaraat, NAPA-mi pisortaq, Søren Würtz, taama oqaaseqarpoq.