Inuusuttut nunanut allanut unammisartut N
Nunanut allanut unammisartuni U-18-ini Naasu Tremmel aamma Mia Rasmussen isaatitsiersaapput, NÛK Faxe Cupimi 32-24-imik ajugaaffigigamikku.
– Siusinnerusukkut pisimagunanngilaq Mia Rasmussenip Kalaallit Nunaanni arsaqatigiinnut arnanut taamak amerlatigisunik isertitsinera, Boas Møller GSS-imeersoq assammik arsarluni arnat unammiuaarneranni Faxe Cupimi ippassaq unammineq pillugu tusagassiorfitsigut nalunaarummini allappoq, tassani nunanut allanut unammisartut U-18 NÛK-mut 32-24-imik ajugaammata, muminnermi 14-12-imik siuaqqasimallutik.
Naasu Tremmel, Viborgip inuusuttuarartaani unammisartoq, nunanut allanut unammisartuni U-18-ini isertitsinersaalluni qulinik isertitsivoq, Mia Rasmussen, aamma Viborgimi unammisartuusoq, qulingiluanik isertitsisoq.
– Unamminerup takutippaa nunanut allanut unammisartut arsamik ingerlatsinerminni aalanermikkullu sukkanerungaatsiartut, taamaattumik tupinnarpallaanngilaq nunanut allanut unammisartut U-18 unamminermi 32-24-imik ajugaammata, Boas Møller oqarpoq.
Karen Marie Kyed Meyer Ruth Kreutzmannilu NÛK-mi isertitsinersaapput marluullutik sisamanik isertitsillutik. Sara Marie Mathæussen, Karen Marie Kyed Meyeritulli isertitsitigigaluartoq, unamminermi isikkamigut ajoquserpoq.
Kâgssagssuup Maniitsumeersup aamma unamminermi siullermi arsarluartortani Pipaluk Møller Jessen atorsinnaajunnaarpaa, seeqqumigut erloqinartumik ajoquserluni unammiunnaaginnartariaqalermat. Faxe Cupimik aaqqissuisut naapertorlugit ajoqusernera pilatsinnermik kinguneqarsinnaavoq.
Kâgssagssuk aamma Nuffik Nuummeersoq unammipput. Nuffik 36-26-imik ajugaavoq, tassanilu Ulla Lynge Nuffik-mi isertitsinersaalluni qulingiluanik isertitsivoq, klubbeqataalu Paninnguaq Larsen arfineq-marlunnik isertitsilluni. Kâgssagssuk-meersut Ivalu Kleist aamma Pipaluk Noahsen marluullutik arfineq-marlunnik isertitsipput.
Unammiuaarnerit sisamanngorpat unnukkut nanginneqassapput, tassani nunanut allanut unammisartut U-18 aamma NÛK nalunaaqutaq 20.00 unammissallutik.