Iserniarnerup ilungersunartua: Nerrivimmi arsaarartartoq innarluutilik inunnut innarluutilinnut tulluartumik iserfissaqalerniarluni ukiorpassuarni utaqqivoq
Niviarsiaraq 12-inik ukiulik sapaatip akunneranut marloriarluni sisamariarluniluunniit nerrivimmi arsaarartarpoq. Naak kaassuartakkamik issiaveqaraluarluni timersorsinnaaqaaq. Unammillernartitaqarporli - Sisimiuni minihaalimut isaariaq innarluutilinnut naleqqussagaq amigaatigaa.
Nuka-Oline 12-inik ukiulik innarluuteqarpoq issiavinnillu kaasuartakkanik atuisuulluni. Taanna sapaatip akunneranut marloriarluni tallimariarluniluunniit Sisimiuni minihaalimi nerrivimmi arsaararluni sungiusartarpoq.
Minihaalip isaariaani tummeraqarpoq aamma inunnut innarluutilinnut naleqqussakkamik isaariaqarluni. Nuka-Olinelli isaariaq innarluutilinnut naleqqussagaq atorsinnaanngilaa. Isaariamummi aqqut ujaqqanik ulikkaarmat issiavik kaasuartagaq atorlugu aqqutigisinnaanngilaa.
Naak nerrivimmi arsaararniarluni issiavik kaassuartagaq atorlugu sungiusartaraluarluni, ajugaaffigisinnaanngisaminik nalaataqartarpoq - minihaalimut isaariaq.
Inunnut innarluutilinnut naleqqussagaq Qeqqata Kommunianiit suliarineqarsimavoq, naak Nuka-Olinemut nuannaarutissaagaluartoq aqqutaa ujaraqarpallaarmat aqqutigisinnaanngilaa.
- Apuukkaangami timersoqatigisartakkaminut sianertarpoq, qujanartumik sungiusimagamikku. Amaasiarlugu majuuteriarlugu kørestolii malinnaatittarpaat, 12-inik ukiulimmut anaanaasoq Debora Jeremiassen Sermitsiaq.AG-mut oqaluttuarpoq.
Ukiuni pingasuni utaqqisut
Naak sungiusaasup timersoqataasartullu ikiuuttuarnerat nuannaarutigigaluarlugu, kissaatigigaluarpaat nammineq ajornaquteqanngitsumik iseriaannaanissaa.
- Maanna ukiut pingasut qaangiussimalerput sungiusaasoq timersoqataasartullu ikiuuttalermatali. Isaarissat aaqqinneqarnissaa ukiuni pingasuni utaqqivarput, tamanna neriorsuutigineqarnikuugaluarpoq.
Debora Jeremiassen kommunimut saaffiginnittarsimagaluarpoq, sulili iliuuseqartoqanngitsoq anaanaasoq oqarpoq, utaqqikatalluinnalerpullu. Paninimi ilaanni silami issittumi isernissaminut utaqqisariaqartarmat.
- Ilaannikkut soorunalimi qullii kuuttaqaat, ilaannikkut silataani utaqqeqqaartariaqartarami. Ukiukkut qiusaqaaq. Ilaanni timersoqatini normussaruttaramigit.
Qeqqata Kommunia oqaaseqartinniarlugu Sermitsiaq.AG sulissuteqarpoq.