Isertitat 13-it - aamma Minik sukalaqaaq
GOG aamma Minik Dahl Høegh ukiumi unammiuaarfimmi 13-issaannik tv'ikkut aallakaatinneqartumik ajugaapput. Otterupimut unamminerminni
Unamminerup immikkoortuani siullermi tukattumik ingerlanerluttumillu arsaateriarlutik nikinnermi GOG målimik ataatsimik 14-13 siuarsimariarlutik unamminerup immikkoortuata aappaani GOG'miut allarluinnaallutik unammeqqilerput.
Nikinnerup kingorna minutsit arfineq-marluk ingerlareermata GOG'miut 21-14-imik siuarput taamaalimmallu fynimioqatigiit unammineranni kikkut ajugaasuussanersut nalunarunnaarluni. GOG qularutissaanngitsumik 34-25-mik ajugaavoq.
Minik Dahl Høegh arfineq-pingasunik iseritsivoq.
Sungiusaasuuneq Jakob Larsen unamminerup kingorna naammagisimaarinnippoq.
- Unamminerup immikkoortua siulleq kakkanniutigisinnaanngilarput, isumaqarpunga immikkoortup aappaani arsarnermik ajunngitsumik takutitsilluta, maannalu ukiup unammiuaarfiup affaa siulleq naammagisimaarlugu kingumut qiviarsinnaavarput sapaatip akunnerani tulliani Lemvigimi unamminissaq ajornaatsuinnaanngitsoq piareersarfigalutigu, unammisassagut Lemvig-Thyborøn Håndboldligamit peersitaanikuusut unamminissaraagut.
Siuttuupput
GOG 13-iarialuni unamminikuuvoq suli ajugaaffigineqarnani taamaattumillu 1. divisionimi siullersaalutik 26 pointeqarlutik inissisimapput.
Ukioq manna unammiuaarfimmi arsaqatigiit anguniagaraat Håndboldligamut ingerlaqqinnissaq, naak unamminerit allat 13-it amigaatigigaluarlugit qanorluunniillu pisoqarsinnaasoq taamaattoq fynimiut assammik arsartartut GOG Jakob Larsenimik Minik Dahl Høeghmillu siuttullit neriulluarput.