Island Games 2023: Kalaallit Nunaat kuultinnalluni naggasiivoq
Sulorartartut Sara Lindskov Jacobsen aamma Jens-Frederik Nielsen arnani angutinilu kisimiilluni unamminerni finaleramik tamarmik kuultinnapput. Taamaalillutik Island Games-imi unammiuaarnerit naammassilluinnalersullu Nunarput kuultinik angerlaassisussanngortippaat.
Kalaallit Nunaanni Timersoqatigiit Kattuffiata siulittaasua assut nuannaarpoq. Taassumami unammiuaarnerni Nunarput sinnerlugu peqataasut angusaat naammagisimaarpai:
- Eqqaamassavarput tuniluunnersuaq covid-19 assorsuaq akornutaanikuummat, pingaartumik aamma timersornermut tunngatillugu. Akornutaanikuugaluaqisoq aammalu ataatsimoorluni sungiusarsinnaanerit killilersorneqarnikuugaluaqisut timersortartortagut timersuutini assigiinngitsuni peqataaffigisaminni unammilluataaqaat angusarissaarluarlutillu, aamma nunat unammisagut sungiusarnissaminnut unammiuaaqattaarnissaminnullu periarfissarissaarnerujussuugaluartut. Taamaammat aap, Island Games 2023-mi nunatta peqataatitaasa angusaat assorsuaq naammagisimaarpakka, Bolethe Stenskov Sermitsiaq.AG-mut oqarpoq.
Sara aamma Jens-Frederik kuultinnapput
Nunarput sinnerlugu unammisut tallimanngorneq sioqqullugu sølvinnapput (Sulorartartut ataatsimoorlutik unamminerminni) tamatumalu saniatigut bronzit pingasut pissarsiaraat (Ivik Nielsen, Aqqalu Nielsen, Karliinannguaq Lundblad aamma Juliane Schmidt).
Sara Lindskov Jacobsen arnani angutinilu kisimiillutik unammisaqattaarnerminni ajugaaniutivinneq angunikuuaat, tallimanngornermilu ajugaaniutivinnermi marluullutik tamarmik ajugaapput, taamaalillutillu Nunarput marlunnik kuultinnatsillugu.
2025-mi Island Games Orkney-mi ingerlanneqassaaq
Island Games 2025-mi pissaaq Orkney-m. Kalaallit Nunaanni Timersoqatigiit Kattuffiata siulittaasua, Bolethe Stenskov Sermitsiaq.AG-mut unnersiorpoq tullissaanut peqataanissamut piareersarnerit aallartereersinnaanngortut:
- Ataatsimeersuarnermi peqataavugut, maanna ilisimalereerparput unammissutit suut unammiuaarnermi ilaatinneqassanersut, taamaalillutalu aamma tullissaanut piareersarneq aallartissinnaalereerparput. tungaanut sulissutigissavarput timersortartortatta sapinngisamik pitsaanerpaamik atugassaqartinneqarlutik unammiuaarnerit tullissaannut piareersarsinnaassasut.
- Taamaattorli massakkorpiaq Nunarput sinnerlugu peqataasut angusaat pitsaasut nalliuttorsiutigeqqaassavagut, Timersoqatigiit Kattuffiannit assorsuaq tulluusimaarpugut nuannaarlutalu peqataatitatta unammilluataarnerat pillugu, ataatsimut isigalugu qeqertarmiut 24-it peqataasut akornanni nr. 13-tut inissippugut, Bolethe Stenskov Sermitsiaq.AG-mut oqarpoq.
Allaaserisap naqqani ilanngupparput Sara lindskov Jacobsen-ip ajugaareernermi kingorna oqaaseqarnera qallunaatoortoq.
