Island Games-eqarnerani angutit arnallu iligiiaarlutik unammilluarput
Sulorarnermi angutit arnallu iligiiaarlutik unammigamik ajugaaqattaarput
Island Games-ertoqarnerani sisamanngornermi angutit arnallu iligiiaarlutik unammeqattaarput, unamminernilu siullerni tamangajanni kalaallit ketcherimik unammisartui ajugaaqattaarput.
Hedvig Broberg aamma Taatsi Pedersen Menorca-miunut unamminerminni torrallaaqalutik ajugaapput. Taakkua tullianik Isle of Wight-imeersut pikkorissut unammigamikkit, bronze-nnanniuuteqataasussanngorput, unamminerminnili Hedvig Broberg-ip aamma Taatsi Pedersen-illu unammisatik sukataartivissorpaat. Unammisartut inuusuttut taakkua marluk unammisatik sæt-ini pingasuni unammigamikkit ingammik aappassaanni unammilluarlutik 21-8-mik ajugaapput.
Anja Skov Kjeldsen aamma Mads Nyvold ottendedels-finalernerminni sæt-it pingajuanni 21-19-mik ajorsarput.
Ivalo Olsen aamma Jens Frederik Nielsen Gibraltar-imeersut pikkorinnersaannut unamminertik aallartillugu pissangaqaat. Kingornali pissangavallaarunnaarput tullianillu aamma Isle of Wight-imeersunut unammilluaqalutik. Taassuma kingorna Olsen aamma Nielsen Gotland-imeersunut ajugaassangatinneqartunut unammipput. Ivalo Olsen aallaqqaataaniit inissilluariarmat Jens Frederik Nielsen-ilu akiulluaqimmat gotland-ermiut pakatsiartuinnarput. Pingajussaannillu unamminerminni kalaallit 24-22-mik ajugaallutik.
Kvartfinalimi iligiit taakkua savalimmiormiunut pikoreqisunut unammipput. Savalimmiormiut 9-2-mik siuaruttorlutik aappaa seeqquiarpoq. Taamaalillutillu Jens Frederik Nielsen aamma Ivalo Olsen semifinalimut annguteriataarlutik. Tassani Guernsey-meersut ajugaassangatinneqartut unammivaat. Taakkua pikkorinaarlugit kalaallit kiisami 21-18-mik 21-14-imillu ajorsarput.
Bronze-nnanniunnermi kalaallit iligiit Isle of Wight-imeersunut unammipput, taakkua tupaallatsitsillutik nr. 2-nngortussatut naatsorsuutigineqaraluartut ajorsartissimallugit ingerlaqqipput. Ajoraluartumik takkua pikkorippallaaluatsiarlutik sæt-ini marlunni unammillutik kalaallit ajorsartippaat.