Jakob Larsenip NFH-llu suleqatigiinnertik ingerlatiinnassavaat

Nykøbing Falster Håndboldklubbip Jakob Larsen ukiuni marlunni suleqatigeqqissallugu ippassaq nalunaarutigaa.

Assammik arsarnerup silarsuaani isumaqatigiissummik isumaqatigiinniarnerit akulikissinnaallutillu sivisusinnaasarput. Ilaatigut isumaqatigiinniartut suleqatigiittarput, taamaalilluni piffissaq sivikitsoq atorlugu isumaqatigiissummik piareersisoqartarluni. Nykøbing Falster Håndboldklub aamma Jakob Larsen pissanganartoqarujussuanngitsumik isumaqatigiinniarsimapput, mannalu isumaqatigiissut atsiorpaat.

Jakob Larsen taamaalilluni Nykøbing Falster Håndboldklubbimi 2026-p aasaanerata tungaanut sungiusaasuunertut ingerlaqqissaaq.

Aqqut takisooq

Jakob Larsenip, maanna 49-nik ukioqartup, ukiut 40-t matuma siorna Ilulissani I-69-ini nukappiaqqat sungiusarnissaat sioqqullugu assammik arsaassutini siullermeerluni qilerpai. Kingorna silarsuarmut angalanerit sioqqullugit NÛK-mi unammisaqattaarnerit ingerlappai. Danmarkimi assammik arsartartutut arlaleriarluni GOG-mut atassuteqarpoq. Piginnaasattaaq Spaniami Frankrigimilu misilittarneqarput. Piffissani silarsuarmi pissartanngorniunnerni nunanut allanut unamminerit 87-t isertitsinerillu 506-it, kiisalu nunarput sinnerlugu silarsuarmi pissartanngorniunnernut pingasunut peqataanerit misigisanut annertuunut ilaapput. GOG-mi aammalu 2017-imiilli Nykøbing Falster Håndboldklubbimi sungiusaasutut atassuteqarnikuuvoq. Arnat angutilluunniit ligaanni maannakkut sungiusaasutut atasuni, Jakob Larsenip NFH-mi sungiusaasuusimaneratuulli allanik nammineq klubbiminni ukiut taama amerlatigisut sungiusaasuusoqarsimanngilaq.

Aatsaat taama angusarissaartigisut

NFH-mi siulittaasoq, siornatigut Guldborgsund Kommunemi borgmesteriusimasoq, John Brædder, tusagassiutinut nalunaarummi ima oqarpoq: Unammisaqattaarnerni kingullermi anguniakkavut naammassineqarput. Ligami pitsaanerpaat sisamaattut inissippugut, Santanderimi Final4-mut peqataavugut minnerunngitsumillu Europa Leaguemi sølvinnalluta. Taamaattumik suleqatigeeqqinnissamik aalajangerneq pissusissamisoorpoq.

Sungiusaasoq usorsisimaartoq

Suleqatigeeqqinnissaq pillugu Jakob Larsenip usorsisimaarinninnerattaaq pissusissamisoorpoq. Jakob Larsen ima Sermitsiaq.AG-mut oqarpoq:

- Unammisaqattaarnerni tulliuttuni marlunni NFH-mi sungiusaasuunissara nuannaarutigalugulu tulluusimaarutigaara. Unammisartuvut pissanganartuupput. Arenataarput kusanartoq 3000-inik isiginnaartoqarsinnaasoq atuleqqammerparput. Aningaasaliisutsinnit, nuannaartorinnittutsinnit namminerlu kajumissutsiminnik sulisutsinnit tupinnaannartumik tapersersorluarneqaqaagut.

Pingaartumik najukkami imminermut paasinninnermut NFH pingaaruteqartorujussuusoq Jakob Larsenip arajutsisimanngikkaa pissusissamisoorpoq.

- Aliikkutaralugu sammisara suliffigigakku soorunami immikkut pisinnaatitaaneruvoq. Nykøbingimi haali ulikkaartoq ajugaagaangatta tupinnartaqaaq. Soorunami ajorsarluni allaaneruvoq. Unammisaqattaarnerit ingerlanerini sapaatip-akunneranut arlaleriarluni misilitseqattaarluni artornarsinnaasoq nalunngilluarpara. Atoruminartuni sungiusaasuulluni oqitsuusoq eqqaamaneqassaaq. Atoruminaatsuni allarluinnaavoq, tassani sumik sananeqaateqarnerluni takutittariaqarnartarmat, Jakob Larsen naggasiivoq.

Europa League

Europa Leaguemi gruppekkaarluni unamminissanut sisamanngormat makitsisoqarpoq. NFH siorna sølvinnannikuunini pissutigalugu unamminerni aallarniutini qullerpaami inissisimavoq. NFH qullerpaamut siumut inissinneqareersut Gruppe A-mut inissinneqarput, tassani unammineqassallutik Ungarnimiit Praktiker-Vac, Norgemiit Storhammar Handball Elite aamma Kroatiamiit HC Prodravka Vegata.