Jakob Poulsenip Danmark VM-imut anngutsippaa
Qallunaat arsaallutik nunanut allanut unammisartui VM-imut anngupput, arsaattarfimminni Sverige 1-0-imik ajugaaffigereerlugu. Jakob Poulsenip qallunaat VM-imut sinnattui piviusunngortippai, unamminerup naammassinissaanut minutsit quliinnanngortut ungasissumit sakkortuumik isertitsigami, isiginnaartut qiimmattarterujussuarlugit.
Sivisuumik allaanngilaq nuanniitsumik 0-0-erlutik unammissasut, unammeqatigiit naligiiginnarnissaq naammagiinnarlugu. Unamminerli naajartulersoq unammisartoqatigiit marluullutik sukakkaluttuinnarput. Isiginnaartullu suaartalermata "iserteriartarlugu" AGF-imi unammisartoq Jakob Larsen ungasiamit isertitseriarpoq. Arsaq målit napasuata talerpia' tungaatigut iserpoq, målmand Andreas Isaksson inorsilaarlugu.
Unamminerup immikkoortuani siullermi Danmark aallartilluarneruvoq arlaleriarlunilu isertitsinissaminut periarfissittarluni, Nicklas Bendtnerillu Jakob Poulsenillu målit uniortarpaat Sverige unamminerup immikkoortuata siulliup qiteqqunnerani kigaatsumik pitsanngoriartorpoq saassusseqattaalerlunilu.
Qallunaat qeqqani illersuisuisa, Daniel Aggerip aamma Simon Kjærip, Zlatan Ibrahimovic paarilluarpaat periarfissippiassanagu. Akerlianik aamma Jon Dahl Tomasson Nicklas Bendtnerilu illua'tungaani imatorsuaq periarfissarsneq ajorput.
Danmarki ajugaanermigut Sydafrikami VM-imut annguppoq, pingasunngorpat Parkenimi gruppimi unammineq kingulleq apeqqutaanngitsoq sioqqullugu. Akerlianik Sverigep maanna nr. 2-ngorniutissaaq, anngunniulluni playoff-imik unamminiasaguni.