Juaat timersullaqqissutut kajumissaatisivoq
Narsami 2009-imi timersullammattut nersornaammik tunniussisoqanngilaq, piukkunnartunulli kajumissaasiisoqarpoq.
Narsami timersortartut sapaammi decemberip 13-ianni kajumissaatinik tuniorarneqarput, ukiormannali timersullammammik toqqaasoqanngilaq. Pissutaavoq piukkunnartunik toqqagassaqanngimmat, sunngiffimmi siunnersorti Vittus Poulsen oqarpoq.
- Timersullammattut toqqagaassagaanni immikkut maluginiartariaqartumik iliuuseqarsimasariaqarpoq, misilittagaqarluni timersulaqqillunilu, timersoqatigiiffiillu inassutigisaasa akornanni taama ittumik nassaarsinnaasimanngilagut, Vittus Poulsen oqarpoq.
Oqaatigaa siunissami meeqqanik kajumissaasiisarneq ileqquliunneqassanersoq isumaliutigineqartoq.
- Meerartagut assut timersornikkut ingerlalluarput, oqarpoq.
Taarsiullugu meeqqanik inuussuttuaqqanillu kajumissaasiisoqarpoq. Kajumissaatit pingaarnersaat Nersornaatit isikkamik arsaattartumut Johan Markussenimut, 14-inik ukiulimmut, N-85-imi ilaasortaasumut tunniunneqarpoq.
Johan Markussen timersuumminik aallussisuunini, sungiusariartuartanini timersoqatogiiffimmilu ilaasortaqatiminik maligassiuilluartuunini pissutigalugit kajumissaaserneqarpoq.
Badmintornertartut Tae Kwon-dortartullu meerartaat angusarisaartarsimasut aamma kajumissaaserneqarput.
Kajumissaasiinik timersortarfimmi ingerlanneqarpoq erinarsoqatigiit, qitittartut operamillu erinarsortoq aliikkusersuisoralugit Tae Kwon -dortartulu takutitsillutik, naak silallerlunilu nuna quasakkaluaqisoq illoqarfimmiorpassuarnik aggiasoqarluarsimavoq, assiliisoq John Rasmussen oqaluttuarpoq.