KAK: GM tamarmik ingerlanneqassapput
Silami arsaannermi pissartanngorniutsitsinerit KAK-ip ukioq manna naammassiuminaatsissimavai, futsalimili arsaanneq ineriartuinnavippoq. KAK-ip 2024-imut anguniakkaminut ilannguppaa silami pissartanngorniutsitsinerit tamarmik ingerlanneqassasut.
KAK-mi siulersuisut nutaat ukioq unammillernartoq naammassingajalerpaat.
Silami arsaannermi pissartanngorniutsitsiniarsimanerit iluatsikkuminaassimasut, KAK-imi siulittaasunngoqqammersup nassuerutigaa:
- Timersornitsinnik soqutiginninneq allanngorarluinnarsimavoq. Tamanna qularutissanngilaq 2023 aamma GM qiviassagaanni, futsalimili arsartartut siuariartorluarput, taakku GM-imik ingerlataqarluarnerusimagamik.
- Silami pissartanngorniutsitsinissamut unammiartussanik pissarsiniarneq ajornakusoornerusimavoq, tamannalu ajoraluartumik niviarsiaqqani arnanilu GM-inngittoornermik kinguneqarpoq, KAK-p siulittaasua Kenneth Kleist Sermitsiaq.AG-mut oqarpoq.
Taamaattumik kattuffiup aappaagu silami arsaannermi pissartanngorniunnerit tamaasa ingerlanniarlugit anguniagaqarpoq.
- Anguniakkat ilagaat 2024-mi GM-it tamaasa pinngitsoorani ingerlanniarlugit, aamma klubbit ilaasortallu pisariaqartitaannik siunnersuinermik sungiusaanermillu pikkorissarnernik ingerlatsinissaq, oqarpoq.
Siulersuisoqatigiit nutaat aqutsilerput
Kenneth Kleist KAK-mi oktobarimi siulittaasutut qinerneqarpoq. Siulersuisut nutaat peqatigalugit Kalaallit Arsaattartut Kattuffiata nunani tamalaani kattuffimmut ilanngunnissaa sulissutigaa:
- Avammut ammanerusariaqarpugut, ilaatigut ukiumoortumik pilersaarusiussaagut qanittukkullu takorluukkavut nutaat tamanut saqqummiullugit. 2024-mi anguniakkatta ilagaat, immaqa inuiattut ullorsiornermi, tamakkiisumik qinnuteqaat CONCACAF-imut nassiunnissaa. Pisortaqarfinnut eqqortumik suliaqarniarluta maanna attaveqarpugut, oqarpoq.
Taassuma oqaatigaa KAK-ip sulissutigigaa Kalaallit Nunaat siullerpaamik Nordic Cupimik decembarimi 2024-mi aaqqissuussinissaa.