KAK-p siulittaasua: Timersorneq pillugu saammaasseqatigiinneq pisariaqarpoq
KAK-p (Kalaallit Arsaattartut Kattuffiata) siulittaasua, Benjamin Kielsen ilumuunnginneraavoq arnat isikkamik arsaallutik nunanut allanut unammisartut sungiusaasuat ammip qalipaataanik immikkoortitsisoqarnerarlugu aammalu pikkorliorneragaalluni naammagittaalliuutaasimanera pillugu sulinertik kigaatsumik ingerlanneqarsimaneragaammat. - Malittarisassat malillugit sulivugut tamannalu timersorneq pillugu maalaartarfiup qullersaasutut inissisimasup naqissusernikuuaa, taamaattorli pingaaruteqarpoq paatsooqatigiittoqarsimanerata qaangerneqarnissaa, taanna oqarpoq.
Benjamin Kielsen, KAK-mi siulittaasutut sassaqqissamaanngitsoq, siulittaasutut inissisimanermini suliassamik imaannaanngitsumik naammassisassaqarpoq, tassalu arnat isikkamik arsaallutik nunanut allanut unammisartut akornanni eqqissisaaneq pissusissamisullu ingerlaqqilernissaanik qulakkeerinninniarneq.
Tassunga pissutaavoq KAK naammagittaalliuummik tigusaqarnikuummat nunanut allanut unammisartut sungiusaasuat unammisartunut danskisut oqaluttunut pissusilersorsimanera pillugu aammalu ammip qalipaataanik immikkoortitsinerarlugu naapertuutinngitsumillu pissusilersornerarlugu.
Janussenip kalaallisut oqalukkusunnera pissusissamisoorpoq
Benjamin Kielsen pisoq pillugu innersuussivoq oqaatsitigut paatsooqatigiinneq aallaaviusimanerarlugu taannalu kaammattuuteqarpoq arnat nunamut allanut unammisartut sungiusaasullu akornanni saammaasseqatigiittoqassasoq:
- KAK-mit tamakkiisumik David Janussen nunanut allanut sungiusaasutut tatigaarput. Innersuussutigissavara nunanut allanut sungiusaasussatut qinnuteqartitsinerput marloriarlugu ingerlannikuugatsigu, siullermik qinnuteqartitsinitsinni qinnuteqartut ikippallaaqimmata. Aappassaanili qinnuteqartitsinerput naammassimmat aalajangertariaqarnikuuvugut toqqaassalluta, qinnuteqartut pingasut akornanni, Benjamin Kielsen oqaluttuarpoq nangillunilu:
- David Janussen sungiusaasussatut qinnuteqamminut aammalu oqaloqatigineqarnerminut atatillugu erseqqissaateqarnikuuvoq kalaallisut oqaluttuulluni, aamma erseqqissaateqarnikuuvoq arnat nunanut allanut unammisartut sullinnerini suleqatissani kalaallisut oqaloqatigisinnaarusullugit, oqaatsit pillugit paatsooqatigiissinnaanerit pinngitsoortinniarlugit, tamannalu tusaatissatut tigunikuuarput suminermilluunniit ammip qalipaataanik immikkoortitsinermut attuumassuteqartinnagu, Benjamin Kielsen nassuiaavoq.
KAK malittarisassat malillugit sulivoq
Taamaattorli attaveqaqatigiinnikkut annertuumik ajornartorsiuteqartoqarsimasoq avaqqutassaanngilaq, tassa unammisartut ilaasa sungiusaasullu akornanni paatsooqatigiittoqarnera pissutaalluni ammip qalipaataanik immikkoortitsisoqarnerarlugu pissusissamisuunngitsumillu pissusilersortoqarnerarlugu naammagittaalliuuteqartoqarneranik kinguneqarsimammat.
Benjamin Kielsen erseqqissaavoq, KAK naammagittaalliuummik tunniussisoqarmat ingerlaannaq aaqqiissutissamik sulissutiginnilersimasoq:
- Ilumoorpoq aallaqqaataaniit malittarisassat malillugit suliaq ingerlassimagipput, aamma ilumoorpoq siulersuisut inerniliillutik aalajangermata unammisartut ilaasa sungiusaasullu akornanni pisoq paatsooqatigiinnikkut pinngorsimasoq, taamaammallu ammip qalipaataanik immikkoortitsisoqarnerarlugu naapertuutinngitsumillu pissusilersortoqarnerarlugu naammagittaalliuut pissutissaqanngitsutut nalilerneqarluni. Tamanna tunngavigalugu siulersuisut aalajangernikuupput David Janussenimut tatiginninneq allanngussanngitsoq aammalu sungiusaasutut sulinera nangittumik tunuliaqutaaffigalugulu tapersersorneqassasoq, Kielsen nassuiaavoq.
Arnat isikkamik arsaattarnerat pillugu saammaasseqatigiinneq pisariaqartoq
Taamaattorli aamma Kielsen erseqqissaavoq arsaattartut naammagittaalliuuteqartut tusaaneqassasut siunissami pisut taamaattut nalaateqqinneqannginnissaat qulakkeerniarlugu:
- Arnat nunanut allanut unammisartut pillugit, aammalumi arnat isikkamik arsaattarnerat ataatsimut tamaat pillugu, pingaaruteqarpoq aaqqiagiinngissuteqartut akornanni saammaasseqatigiittoqarnissaa tassanngaaniillu ingerlaqqittoqarnissaa. Målernavianngilagut ajornartorsiut timersornerup silarsuani aalajangiisartut qullersaasa aalajangeereernerisa kingorna uninngaarfigiinnassagutsigu, tassa Sunngiffimmi aallussisartunut, torersumik aaqqissuussaassumillu ingerlatsisoqarnissaanut ataatsimiititaliamit suliaq naammassineqareermat.
- Sunngiffimmi aallussisartunut, torersumik aaqqissuussaassumillu ingerlatsisoqarnissaanut ataatsimiititaliamit KAK ilalerneqarnikuuvoq suliamik ingerlatsineq eqqortumik ingerlanneqarsimasoq, taamaammat neriuppunga arnat nunanut allanut unammisartut tassanngaaniit ingerlaqqissinnaalissasut, KAK-p siulittaasua, Benjamin Kielsen nassuiaavoq.
Naggataatigut Benjamin Kielsen erseqqissaavoq siulittaasutut nammineq tunuarniarnini tassunga attuumassuteqanngitsoq, namminerli toqqakkaminik arsaq tullissaminut ingerlateqqikkusukkini:
- Oktoberimi Kalallit Arsaattartut Kattuffiat ataatsimeersualerpat siulittaasutut tunuarnissara aalajangernikuuara, taamatullu aalajangernera matumani pisumut attuumassuteqanngilaq. pisormi sioqqullugu aalajangereernikuuvunga tunuassamaarlunga. Tassunga pissutaasut ilagaat KAK maanna sulissuteqarmat Concacaf-imut (Nunat Amerika avannaani Kujataanilu kiisalu Caribiami arsaattartut kattuffiisa kattuffissuat), uangalu isumaqarpunga pissusissamisuussasoq KAK nunat tamalaat akornanni arsaanneq pillugu suleqatigiiffissuarnut naleqquttumik piginnaasalimmik siulittaasoqarnissaa, uangalu siulittaasuuninni angusassatut siunnerfikka naammassereersutut misigisimagakkit, taamaammallu arsap ingerlateqqinnissaa pissusissamisoortoq, Benjamin Kielsen oqarpoq.