Kalaallit assut! Iran inaarutaasumik unamminermi naapissavaat
Kalaallit Nunaannit arnat assammik arsarlutik nunanut allanut unammisartut nunarsuarmi pissartanngorniunnermi ajugaasinnaanissaminnut ullumikkut naggataamik periarfissaqarput. Iran unamminermi naapissavaat, taakku nr. 31-nngorniunnermi ukiut marluk matuma siorna ajugaasimapput.
Assammik arsarluni nunarsuarmi pissartanngorniunnermi peqataaneq naggaserlugu Kalaallit Nunaat Iranimut nal. 13.00, tassa Kalaallit Nunaanni nal. 10.00 unammisussanngorput.
Nunanut allanut unammisartut inissinniunnermi nr. 31-nngorniuttussanngorput.
Kalaallit Nunaat assigalugu Iran unammersuarnermi eqimattakkaarluni unamminerni sakkortulluinnartunik unammisartunik unammeqateqarsimavoq, Japanimullu ajorsarujussuarsimalluni.
Iranili VM-imi siornatigut nr. 31-nngorsimavoq, tassa 2021-mi inissinniunnerni ajugaangami.
Unammineq ajugaaffiusinnaasoq kingulleq
Kalaallit Nunaat Presidents Cupimi 7. decemberimili unammisaqattaalerpoq. Unamminerni Island, Kina aamma Paraguay naapinneqarput. Unamminerni unammillerluarfiunerpaaq tassaavoq Paraguayimut unammineq. Paraguay 19-21-mik ajugaaqqarpoq, Kalaallit Nunaatalu Iran taamaasilluni nr. 31-nngorniunnissami naapittussanngorlugu.
Kalaallit Nunaata assammik arsarluni nunarsuarmi pissartanngorniunnerni peqataanerani kingullermi Sermitsiaq.AG soorunami malinnaassaaq.