Kalaallit Nordic Cupimi unammineq kingullermi ajorsartut
Angut futsalimi nunanut allanut unammisartut Nordic Cup Hjørringimi ingerlanneqarnerani, Estlandimut arfininngornermi sapaammilu unamminerit katinnerini ajorsarput, nr. 6-inngorlutillu.
Kalaallit Nunaannit angutit futsalimi nunanut allanut unammisartut Nordic Cupimi inissinniunnerni Estlandimut marloriarlutik unammipput.
Estlandimut unammineq siulleq arfininngornermi ingerlanneqarmat kalaallit 4-1-mik ajugaapput. Unamminerullu aappaa sapaammi aallartimmat, kalaallit Nordic Cupimi nr. 5-inngorniunnermi ajugaanissaannut periarfissagissaarnerupput.
Taamalli inissittoqanngilaq.
Straffeqattaarnermi isertitakinnerusut
Kalaallit Nunaat Estlandilu aappassaaneerlutik 17. december unammimmata, unammineq pissanganarluinnarpoq.
Unammineq naammassimmat Estland 4-2-mik ajugaavoq, inissinniunnermi inernit katinnerat 6-6-inngorluni.
Unamminerup naammassereernerani straffeqattaartoqartariaqalermat, Estland Kalaallit Nunaannut ajugaavoq, straffeqattaarnermi 5-3 inerniummat.
Kalaallit Nunaat Nordic Cupimi 12. decemberimili unammeqataalerpoq. Danmarkimut ajorsarujussuarsimapput, Norgemulli naligiillutik.
Danmark Nordic Cupimi ukioq manna ajugaavoq. Pissartanngorniutivinnermi Letlandimut unammigamik 7-1-imik ajugaapput.