Kalaallit Nunaat aallartilluaraluarluni Islandimut ajorsarpoq
Kalaallit Nunaat 14-37-mik Islandimut ajorsarpoq Presidents Cup-imi unamminerit siullersaanni.
Kalaallit arnat assammik arsarlutik nunanut allanut unammisartut aallartillualaavipput Islandimut unamminernimmi, aallartilluarnerminni Island naligillualaavippaat allaallu unamminerup minutsiini qulini siullerni siuaqqaleraluarlutik.
Taamatuttaaq arnat nunanut allanut unammisartut unamminerminni kalaallinit isiginnaartunit tapersersorluarneqarput Frederikshavnimi Arena Nord-imi sisamanngornermi unammigamik.
Taamaattoq Island tamaviaaqaluni unamminerup immikkoortuisa siulliata qiteqqunnerani siuarsimalerput. Tamanna pivoq kalaallit unammisut ilaat unamminermit anisitaagallarnera iluaqutsiullugu aammalu kalaallit målerneq ajuleqqaffianni siuarnissaminnut periarfissartik atorluaramikku, unamminerup unikkallarnerani 18-8-mik siuarsimalernerannik kinguneqartumik.
Unamminerup immikkoortuisa aappaanni kalaallit arnartaat tamaviaarput islandimiut siuarsimanerat anguniarlugu.
Nunanut allanut unammisartut sungiusaasuat Anders Friis timeout-erpoq unamminerup immikkoortuisa aappaata naammassinissaanut minutsit aqqaniliinnanngortut, tassani 13-31-mik inissisimapput.
Unillatsiarnerli allanngortitsinngilaq, tassami unillatsiarnerup kingorna Island siuaqqanerminik annertusaavoq taamaalillunilu målinik 20-nik siuarsimalerluni.
Unammineq naammassimmat 14-37-mik inerneqarpoq.
Islandimut unammineq unammisaqattaarnerni Presidens Cup-imik taaguuteqartut siullersaraat, tassani nunarsuarmi pissartanngorniunnermi nr. 25-miit nr. 32-nngorniunneruvoq. Unamminerup tullissaa arfininngorpat pissaaq, tassani Kalaallit arnat assammik arsarlutik nunanut allanut unammisartut Kina naapissavaat.