Kalaallit Nunaat ajugaarujussuarpoq
Kalaallit Nunaata Australia 36-15-imik ajugaaffigaa taamalu U20-it silarsuarmi pissartanngorniunneranni Sydkoreami ingerlanneqartumi normu 21-nngorluni.
Arnat U20-it VM-erneranni Kalaallit Nunaat ullumikkut ataasinngornermi kingullermeerluni unammivoq. Australia 36 - 15-imik ajugaaffigerujussuarlugu muminnermilu kalaallit 19-07-eqqallutik.
Taamaalilluni Kalaallit Nunaat VM-ernermi normu 21-inngorpoq.
GHF-ip siulittaasua Boas Møller Sydkoreamiit unnersiorpoq:
– Muminngitsulli ajugaanissaat qularnarunnaarpoq, nivissat silarsuarmi pissartanngoiunnermi peqataanertik naggataarluaqimmassuk. Unammisassatik ilisarisimanngilaat, Australiami Honh Kongimut ajugaarujussuarnikuummat naligiissangasimagaluarput. Minutsit 12-it siulliit qaangiutiinnartullu Kalaallit Nunaat 9-2-mik siullinngorpoq. Taava muminnissap tungaanut siuaqqanertik attanniartussanngorpaat, iluatsilluarlugulu. Muminnerup kingorna Kalaallit Nunaat siuariartortuarsinnarpoq, muminnermiillu minutsit 20-it qaangiummata isertitsinernik 20-nik siuaqqalerput. Taavalu australiamiut qanillisinnaveersaaginnartussanngorpaat, GHF-ip siulittaasua Boas Møller Sydkoreamiit oqaluttuarpoq.
Unamminerup kingorna Sara Egede Kalaallit Nunaat sinnerlugu unammilluarnerpaatut taaguuserneqarpoq.
Kalaallit isertitsitsisoraat:
Ivanna Holm 8
Mia Rasmussen 5
Sara Egede 5
Panu Grønvold 4
Naasu Tremel 3
Aili Pedersen 3
Najaaja Lyberth 3
Kathrine Mikkelsen 3
Christina Lange 2
Kalaallit nunanut allanut unammisartui VM-imut peqataasimanertik akuersissutigineqareeerpat marlunngorpat Sydkoreamiit allassapput. Unammisartut assammik arsartarnerup tungaatigut ilikkagaqarluarsimapput minnerunngitsumillu kulturikkut misigisaqarsimaqalutik. Unammisartut Kalaallit Nunaanni najugaqartut pingasunngorpat angerlamut apuunnissaat naatsorsuutigineqaarpoq.