Kalaallit Nunaat Kinamut unammilluaavippoq
Kalaallit Nunaat arfininngornermi Kinamut Presidents Cup-imi unamminermi Kinamut 24-32-mik ajorsarpoq.
Arfininngornermi arnat assammik arsarlutik nunanut allanut unammisartut Presidents Cup-eqarnerani Frederikshavnimi unammeqqipput.
Arnat assammik arsarlutik nunanut allanut unammisartut Kinp unammisartuinut sukataarluaavipput, unamminerup ingerlanerani Kinap siuarsimanera angungujartupallattarlugu.
Nunanut allanut unammisartut 24-nik målerput, VM-ernermi aammalu maannakkut Presidents Cup-ernermi maannamut ajorsarneq annikinnerpaaq anguneqarpoq.
Kalaallit Nunaat unamminerup aallartinnerani ingerlarsorlualaavippoq, Kinamiunullu 3-3-mik naligiilerlutik, taamaattorli tamatuma kinguninngua målernaveernerat sivisuallaalaarmat, unammineq 10 minutsit ingerlareersoq nunanut allanut unammisartunut sungiusaasartoq Anders Friis trak unillatsiarnissamik timeout-imik qinnuteqarpoq, tassani Kalaallit Nunaat 3-7-mik kinguaqqalersimavoq.
Kinamiut siuarpallaarnaveersaartilluarpaat
Unamminerulli ingerlaqqinnerani Kinamiut arnartaat siuariartoqqilerput, muminnissamullu unillatsiartoqarmat Kina målinik qulingiluanik siuarsimavoq 8-17-mik inissisimagamik.
Unamminerup immikkoortuisa aappaanni kalaallit arnat aallartinnerliorput arlaleriarlutik saassussinerliorlutik, paarlattuanilli målmandip marloriarluni annaassilluataarnerata malitsigisaanik sukataaqqilerput, taamaalimmat Kalaallit Nunaat måleqqippoq Sascha Zeeb målertoralugu 9-17-eramik.
Tamatuma kingorna unammineq sukataarfioqisoq ingerlavoq, tassanilu Kalaallit Nunaat arlaleriarluni ingerlarsorluaavinnermigut Kinamiunut siuarsimavallaartinnaveersaarneqarput taakku arfineq pingasunik siuaqqammata.
Unamminerup minutsiisa 51-saanni 19-26-mik inissisimasoqarpoq, unamminerullu sinnerani naanissaata tungaanut illuatungeriit måleqattaarput, unammineq naammassimmat inissisimaneq 24-32-iulluni.
Kalaallit arnat assammik arsarlutik nunanut allanut unammisartut unamminissaat tulleq pissaaq ataasinngorpat, tassani Paraguay naapinneqassammat.