Kalaallit Nunaat Savalimmiullu ajugaaniussapput
Savalimmiormiut arnani ataasiakkaarluni unammisartuisa pitsaanersaraat Sigrun Smith.Sulorartartut unammiuaarneranni AGIBE-mi Kalaallit Nunaat Savalimmiullu iligiikkuutaarluni ajugaaniutivinnissaat naligiiffiulluassaaq.
Kalaallit nunanut allanut unammisartuisa Tuluit Nunaata qeqertaaraasa ilaat Isle of Man semifinalimi 3-2- mik ajugaaffigaat.
Arnaq angullu iligiillutik unammimmata Pilunnguaq Chemnitzip aamma Eigil Bay Johansenillu Cara Kerwin aamma Neil Harding 21-17 aamma 21-18-nik ajugaaffigaat. Arnat ataasiakkaarlutik unammineranni Millie Kongstad Christen Carlow-imut 21-12 aamma 21-18-mik ajugaavoq.
Tuluit Nunaatali qeqertarmiusa ajorsarnertik 2-1-nngortippaat, tamatumuuna Frederik Elsner Matthew Wilkonsonimut 17-21 aamma 16-21-mik ajorsarmat.
Arnat marlukkuutaarlutik unammineranni Kalaallit Nunaata ajugaaniutivinnissaminut qulakkeerpaa Aviaja Geisler aamma Millie Kongstad Cara Kerwin Nicola Wilkensonimut 21-12 aamma 22-20-mik ajugaammata.
Angutit marlukkuutaarlutik unammineranni Minik Pedersen aamma Hans Henrik Heilmann Neil Hardingimut Matthew Wilkensonimullu 14-21 aamma 21-23-mik ajorsarput. Tamannali kalaallit savalimmiormiunut unummut ajugaaniutivinnissaannut akornusiinngilaq. Isle of Man Gotlandimut 3-2-mik ajugaavoq.
Savalimmiormiut iligiikkuutaarluni unamminermi unamminerit tallimassaanni ajugaanniutivinnissamut qulakkeerinnipput, arnaq angullu iligiillutik, Sigrun Smith aamma Aksel Poulsen Victoria Meimermondtimut Jonas Andersonimullu 21-13, 18-21, aamma 21-17-mik ajugaammata.
– Isumaqarpunga ajugaaniutivinnissaq pissanganassaqisoq, unammeriaasissarsiorsimaqisut takussaqappagut. Kikkut unamminerni assigiinngitsuni unamissussaanersut oqaatigerusunngilara. Unammissussat unammeriaasissaat pineqartorujussuussaaq, Savalimmiormiut nunanut allanut unammisartuisa sungiusaasuat Tobias Effersøe Sermitsiaq.gl-mut oqarpoq.
– Neriuppugullu unammisartutta pitsaanerit ilaat Niclas Eysteroy Islandimit ullumi tikissasoq. Tikissimassappat naluara unamminernut sorlernut ilanngutissanerlugu.
– Isumaqarpunga kalaallit unammisartuisa nunaminni unamminerminni TV-kullu toqqaannartumik aallakaatitsinissaq pissutigalugu ajunngitsumik takutitsiniarlutik tamaviaarnerussutigisariaqassagaat. Ajugaaniutivinnissami ajugaassagatinneqanngilagut taamaattoq ajugaaniutivinnissamik tunaartaqarnerput anguarput. Savalimmiormiut iligiikkuttaarluni unamminerni ujaminnanngisaannarput, taamaammat isumaqarpunga unammisartugut eqqissisimasumik unammissasut. Imaanngilaq kuulti piniarnagu eqqissisimasumik unammissasut. Soorunalimi angusassaq pitsaanerpaaq anguniassavarput iligiikkuuttaarlunilu unamminermi ajugaaneq ataasiakkaarluni unamminissamut aamma pingaaruteqartupilussuussaaq, ajugaasimaneq eqqarsataatsimut pissatitsisarmat, Tobias Effersøe oqarpoq.
Iligiikkuuttarluni ajugaanniutivinnerit KNR-TV-kut nalunaaqutaq 19.55 aallakaatinneqassapput.