Kalaallit Nunaat suli mattusimaneqartoq
Panamerikamiut kattuffissuata Kalaallit Nunaata kattuffimminni peqataatinnissaa suli akueriumanngilaa.
– Suliaq maanna ima ingasatsigilersimavoq, nunat tamat assammik arsartartut kattuffissuannut IHF-imut ataasinngormat januaarip 28-iani suliaq manna aaqqeqqullugu sakkortuumik allagaqarsimalluta, taamak kalaallit assammik arsartartut peqataatitaasa pisortaat Kurt Lauritsien Sermitsiaq.gl-imut oqarpoq.
Qisuariarneq pivoq, panmarkikamiut kattuffiallu PATHF piffissami sivisunerusumi attaveqatigiittoqartareersorlu. IHF-ip kalaallit nunaata PATHF-imi tamakkiisumik ilaasortaanera aalajangereeraalu taamalu aamma VM-imut anngunniunnernut peqataasinnaanera pillugu PATHF-ip akuererusunngilaa.
– Maanna PATHF-ip utoqqatsissutit "piunngitsut" atorlugit peqataatinnaveersaaraatigut nunat tamat kattuffissuannut allagaqarpugut. Maanna suliami tamatumani tusarniarneqarsimannginnertik naammagittaalliuutigaat. Kisianni uagut nalunngilarput Kalaallit Nunaata ilaasortaanerata akuerineqarnera sioqqullugu IHF-ip PATHF-illu akornanni sivisuumik attaveqatigiittoqartarsimasoq, Kurt Lauritsen oqarpoq.
– Ilaasortaaqqunata tunngavilersuutaannut ilaapput badmintonertartut kattuffiat Tae Kwon Do-rtartullu kattuffiat europamiut kattuffiannut ilaammata. Uagut arnartagut U-18-it pilersaarutit malillugit panamerikami pissartanngorniunnernut peqataasussaapput. PATHF-ip tungaaniit paasussutissat pissarsiatuarisavut tassaapput, Chile-mi sissami assammik arsarnissat.
– Maanna allappugut panamerikami kattuffiup suliamik kinguarsaaqattaaratik taamalu arnani U-18-ini martsimi angutillu inersimasut aasamut peqataasinnaajunnaarnissarput pinnagu assammik arsarneq salliutinniartariaqaraat.
– Aamma uagut peqataatinneqarnata pissartanngorniunnerit ingerlanneqassappata unammisaqattaarnerup unioqqutitsisumik ingerlanneqarneranut IHF-imut piumasaqaatiginiarlugu aalajangerpugut, Kurt Lauritzen oqarpoq.
Kalaallit Nunaat panamerikamiut pissartanngorniuttarneranni 1998-imiilli peqataasarpoq, taamanikkut pikkorinnerpaanut ajorsarujussuartarlutik. Kisianni maanna Kalaallit Nunaata pikkorinnerpaat unammillerluarsinnaalerpai, taamalu Tysklandimi VM-eqarnerani peqataanerisa kingorna panamerikamiut kattuffiannit anisitaalluni.
Kalaallit Nunaata naammagittaalliuut siorna novembarimi ajugaassutigaa, kisianni taamatut aalajangerneq panamerikamiut kattuffiata suli akuersaarsinnaanngilaa.