Kalaallit pikkunaatsumik naggasiipput
Kalaallit angutit assammik arsartartut arfininngormat Uruguayimut unammigamik ajorsarput. Angusat ajuunnerillu takukkit.
Amerikap nunavittaani pissartanngorniunnermi kalaallit nr. 6-itut inissipput, Uruguayimut 27-30-mik ajorsaramik unitsiarnermi 13-15-imik kinguaqqareerlutik.
Kalaallit Brasiliamut Cubamullu unammilluareerlutik ajugaasimasinnaagaluarput.
- Ajorsarneruvoq uggornartoq pisariaqanngitsorlu. Unamminermi pigaaruteqartuni arlaallit unamminerlupput. Kingumut Minik Dahl Høegh aamma Hans Peter Motzfeldt siuttuupput. Kalaallit Nunaanni Assammik Arsartartut Kattuffianni KNAAK-mi siulittaasup tullia John Jakobsen tusagassiuutitigut nalunaarummi allappoq.
- Unamminerup immikkortuata aappaani minutsit 15-it ingerlareersut unammisut 23-23-mik naligiipput. Unamminerup naanissaanut minutsit arfiliinnanngortut 26-26-imik inissisimasoqarpoq, kingornali ajutoortoqarpoq. Taamaalilluni Uruguagy 30-27-mik ajugaavoq, John Jakobsen oqaluttuarpoq.
Argentina Amerikap nunavittaani pissartanngorpoq, Brasilia 28-27-mik ajugaaffigigamiuk marloriarluni unammineq sivitsorneqareersorlu. Chile bronzennattuuvoq,, Cuba 34-31-mik ajugaaffigigamiuk.
Kalaallit ajuuttut ukuupput:
Minik Dahl Høegh aamma Hans Peter Motzfeldt tamarmik 7
Miilu Rosing aamma Angutimmarik Kreutzmann tamarmik 3
Jakob Larsen 2
Muusa Ostermann Søholm, Erik Motzfeldt, Andreas Lorentzen, Miki Heilmann, aamma Rasmus Larsen tamarmik 1.