Kalaallit Ujakkaarnermi Danmarkimi pissartanngorniuttoqarnerani pisassaanngitsut
Kalaallit 2022-mi ujakkaarnermi danskit pissartanngorniunneranni nukittunertik ulluni makkunani takutittarpaat. Ullunimi makkunani Sverigemiittumi Nässjö-mi meeqqat, arnat angutillu ujakkaanermi kuultinik medaaliannattajoorput.
Kalaallit ujakkaartartut tamarmik ujakkaarnermi Sverigemi ingerlanneartumi Danmarkimi pissartanngorniunnermi stafettimi sprintimilu annguttut siulliit tallimat akornanniissimapput.
Nivi Geisleri Agente Blicherilu arnat unammersuarmata Danmarkimeersunit Leonora Ishøi Rønhedemit aamma Alma Winsløw-Lydekingimit millisekundimik siulliulaalutik apuukkamik ajugaasimapput. Marika Magnussen aamma Sasja Joelsen NSP Skiklubbimeersut pingajullutik apuussimapput. Taakkua saniatigut Marie Lundblad aamma Marie Fleischer ujakkaarluni stafettimi pissartanngorniunnermut normu 5-iusimapput.
Unammersuarneq naligiiffiusimaqaaq, siullertummi normu 5-itullu apuuttut sekundit sisamat missaannaannik nikingassuteqaramik, kalaallillu taamaalillutik kuultinik bronzenillu medaaliannassimallutik.
Angutini Martin Møller Bent Sallingilu ajugaasimapput. Danskinut unammisaminnut naligiissimaqaat, tassani kalaallit ujakkaartartut danskinit sekundinik marlunnik siulliulaarlutik apuussimagamik.
Frederik Lundblad Qulutak Møllerilu normu 4-simapput, Adam Goliatsen Wille aamma Kim Godtfredesen normu 5-inngorsimasut.
Sprintimi ajugaanerit arlallit
NSP skiklub Nuummeersoq sprintimi aamma pitsaassutsimik takutitsilluarsimavoq. 2006-2007-imi inunngorsimasunit Marika Magnussen normu 1-iusimavoq, Sasja Joelsen normu 3-usimalluni. Tupaarnaq Grønvold normu 2-jusimavoq, tassani Anna Winsløw-Lydeking Danmarkimeersoq unammisimallugu.
Nivi Geisler arnani pissartanngorsimavoq, klubbeqatinilu tassani unammingaatsiarsimavai. Marie Lundblad normu 2-nngorsimasoq, Agnete Blicher normu 3-nngorsimavoq.
Angutini Martin Møller normu 1-iusimasoq, Frederik Lundblad aamma NSP-meersoq normu 2-jusimavoq. Kim Godtfredsen 1963-72-imi inunngorsimasunit normu 2-jusimavoq.
NSP skiklubbimi nukarlersaasutut peqataasoq Inuuna Olsvig aamma unammersuaqataasimavoq, taanna malinnaaffigineqarsinnaavoq, ugguuna.