Kent Kielsen sungiusaallammattut pikkorissarpoq

Kent Kielsen Qaqortormiu Dansk Boldspil Unionip (DBU) A-uddannelsianut (A isumaqarpoq "avance" = sungiusaallammak), 2011-p ingerlanerani ingerlanneqartussamut tiguneqarsimavoq.

Sungiusaasutut A-tut ilinniagaqarneq UEFA-mit akuerineqartoq ilinniagaqarfiuvoq pitsaasoq pilerinartorlu, tamatumani ilaatigut peqataallutik qallunaat aningaasarsiutigalugu arsaattartuusimasut arlallit, soorlu Ebbe Sand, Thomas Helveg, Kim Daugaard aamma David Nielsen.

- Kent Kielsenip DBU-p A-tut ilinniagaqartitsinera ingerlakkuniuk arsaannermi sungiusaasutut suliassat qaffasissut isumagisalersinnaavai, tamatumalu saniatigut siunissami GBU-mi sungiusaasunik ilinniagaqartitsineq ingerlassinnaallugu, assersuutigalugu arsaannermik sungiusarfimmi sungiusaasutut. Piffissaq ungasinnerusoq isigalugu Kalaallit Nunaanni B1-imik ilinniagaqartitsinermi ilitsersuisup ikiortaatut sulisalersinnaavoq, taamaasilluni tassani ilinniartitsineq annertunerusumik kalaallisut ingerlanneqarsinnaalissalluni, Kalaallit Nunaanni Arsartartut Kattuffianni siulittaasoq Lars Lundblad oqarpoq.

GBU-p DBU suleqatigalugu anguniagalimmik UEFA-mit akuerineqartumik sungiusaasutut ilinniagaqartitsinermik neqerooruteqarneragut ukiuni aggersuni kalaallit amerlanerusut pikkorissartalersinnaapput, A-tut ilinniagaqarnerup ingerlannissaanut piginnaaneqalersitsisumik - assersuutigalugu inuusuttut nunanut allanut unammisartut sungiusaasuat Rene Olsen arnallu nunanut allanut unammisartut sungiusaasuat Bent Petersen.

-Siuliani taaneqartutut DBU-p A-tut ilinniagaqartitsinera annertuujuvoq taamaattumillu Kentip peqataanera kattuffimmut aningaasartuutaasorujussuuvoq. Tamatumunnga atatillugu DBU paasinnilluarsimavoq peqataanissamullu annertuumik akikilliliisimalluni. GIF aamma Team Grønland GBU-p pakatsissutigeqisaanik tapiissuteqarumasimanngillat, Lars Lundblad oqarpoq.

Sungiusaallammattut ilinniagaqarneq ima ingerlanneqassaaq:

A. Sapaatip akunnerata naanera paasissutissiiffik arfininngorneq/sapat 8.-9. januar

B. Paasisassarsiorluni angalaneq - Hollandimut sapaammi februaarip 27-ianniit sapaammi marsip 6-iannut

C. Upernaap ingerlanerani praktikkerneq

D. Sapaatip akunnerata qeqqani ingerlatsineq marlunngornermi juunip 27-ianniit sapaammi juuli 3-annut

E. Ukiap ingerlanerani praktikkerneq

F. Outro-weekend arfininngorneq/sapaat 10.-11. decembar

G. Soraarummeerneq qularnanngitsumik decembarip 12-ianni