Kessler tilluutilerpat peqataassaaq
Mikkel Kessler aqagu Brian Magee-mut tilluutilerpat kalaallimik saqqummertoqassaaq
Tilluuttartup affarmik kalaaliusup Brian Lentz'ip pania aqagu arfininngornermi qallunaaq tilluuttartoq Mikkel Kessler Irlandip avannaaneersumut Brian Magee-mut unamminerani nivissat normunik saqqummiisartut ilagissavaat.
WBA'mik tilluunnermi supermellemvægtini Herningimi nunarsuarmi pissartanngorniuttoqarnissaanut atatillugu nivissat kikkut normunik saqqummiussisassanersut taasissutigineqarnerani Mille Lentz, normu 2'nngorpoq.
Mille Lentz atuartartut 28.885-it taasineranni 12,63 procentinit taaneqarpoq torrallaavilluni normu 2nngorluni - taamaattumillu normunik saqqummiussinissaminut qulakkeerinnilluni, Ekstra Bladet allappoq.
- Tilluunneq peroriartorninnut ilaavoq. Ataataga arfineq-marloriarluni Danmarkimi pissartanngornikuuvoq ilaatigut 92-imi OL peqataaffigalugu. Uanga aamma tilluunneq ingerlatilaarnikuuara sulilu tilluutilaartalunga, Mille Lentz Ekstra Bladetimut oqarpoq:
- Misigisassaq angisooq aamma Kessler - Magee tillunnissaannik saqqummiussinissaq suliassaavoq immikkut pingaarutilik. Pissangasorujussuvunga!