Kipketer Maniitsumi

Arpattartup Wilson Kipketerip pingasunngormat maajip 12-ianni sivikitsumik Maniitsumut tikeraarnermini meeqqat inersimasullu arlalissuit sialualaartoq arpaqatigai.

Arpattartoq Kenyami inunngorsimasoq, 90-ikkunni Sparta-mi Kim Godtfredsenip klubbeqatigisimasaa, 800 meterimut arpaqatigineqarpoq. Wilson Kipketerip 1997-imi sukalanerpaaffissani tikippaa 800 meterimullu nunarsuarmi rekordiliilluni atorlugit 1:41:11 minutsit.

Arpattartuunera nalissaqanngitsoq 1998-imi nappaammik malaria-mik kipitinneqarpoq, Wilson Kipketerilli arpattartuutini nangeqqippaa 2004-milu Athenimi OL-imi naggataarluni.

Pingasunngormat Maniitsumi arpaffik ussagarneqarluarpoq. Arpattartoq tusaamasaq eqqissilluni arpappoq.

- Tullianid takkukkuma tamaviaarnerujumaarpunga, Wilson Kipketer arpannerup kingorna oqarpoq.

Wilson Kipketer sisamanngorpat ualikkut Nuummi kulturip illorsuani Katuami oqalugiassaaq. Aaaqqissuussineq pingasunngormat ingerlanneqartussaagaluarpoq. Nuummiilli Maniitsumut angalanissaa ullormik ataatsimik kinguartoorpoq silarlunnera pissutigalugu. Taamaattumik aaqqissuussineq aatsaat sisamanngornermi ualikkut ingerlanneqassaaq.

Maniitsumi angusat:
5 - 8-nut ukiullit:
Nr. 1. Jørgen Pedersen, 3,55 min.
Nr. 2. Minik Josefsen, 3,56 min.
Nr. 3. Kuluk Poulsen, 4,28 min.

9 - 12-inut ukiullit:
Nr. 1. Nathan Josefsen, 3,14 min.
Nr. 2. Mikal Mikaelsen, 3,18 min.
Nr. 3. Nick Lyberth, 3,22 min.

13 - 17-inut ukiullit:
Nr. 1. Maligiaq L. Berthelsen, 2,47 min.
Nr. 2. Malik Hjøllund, 2,48 min.
Nr. 3. Søren Kreutzmann, 2,57 min.

Fra 18-iniit qummut ukiullit:
Nr. 1. Kim Godtfredsen, 2,23 min.
Nr. 2. Per Rasmussen, 2,24 min.
Nr. 3. Anguteeraq Petersen, 2,50 min.
Nr. 4. Johannes Rosing, 3,05 min

Arnani sukkanersaavoq Vivian Tetzschner atorlugit 3,11 minutsit.