Kristoffersen toraajuvoq
Kristian Kristoffersen ooqattaajutigaluni ujakkaarnermi toraajunerit ilaattut malunniuppoq.
Ooqattaajutigaluni ujakkaartartoq Kristian Kristoffersen unammiffimmi matumani eqquisarnemi procentit 90-t anguvai. Ooqattaajutigaluni ujakkaartartut ikittuinnaat tamanna nallersinnaavaat, Timersoqatigiit Kattuffiat nittartakkamini allappoq.
Kristian Kristoffersen unamminermini siullerni tallimani nikorfalluni tulleriinni arfinilinnik tamarmik immikkut tallimariarluni seqqortarsimavoq. Igeriarnerni katinnerini 30-jusussaasuni 27-riarluni qiterpaavoq.
Nikorfalluni 50 meterisut ungasitsigisumit eqqoriagassat tennis-imi arsaaqqatut angitigaat, unammisorlu 6,6 km ujakkaareerluni uummataata kassunnera minutsimut 130-150-riartarpoq. Eqqoriagassaty tallimat seqqornerit tamaasa sekuntit 1-2-nik akunneqartunik eqqortariaqarput.
Kristian Kristoffersen kingullermik unammeqataavoq Østrigimi Obertilliach-imi IBU-cup-imi unammineq, nikorfalluni unioqqinngitsoorpoq. Unamminermi ajugaasuuvoq italiamiu Marcus Windisch, tulleriinni marloriartuni uniornani, aammalu ujakkaartuni sukkanersaalluni.
Kristian Kristoffersen palloqqalluni marloriarluni uniorpoq. Tamanna Kristianip unammisuni 168-iusuni 95-ississaannut inississutigaa, ajugaasumit 3,39 minutsinik kigaannerulluni.