Kujallermi timersullammaat nersornaaserneqartut
Timersortartut, sungiusaasut kajumissutsimminnillu suliaqartut Kommune Kujallermi tallimanngornermi febaruaarip 18-ani nersornaaserneqarput. Qaqortumi nersornaasiinermi borgmester Stine Egede allaffimini nersornaasiivoq, Narsarmi Nanortalimmilu nersornaasiinerit sumiiffinni kommunalbestyrelsinit ingerlanneqarput.
Timersortartut, sungiusaasut isumalluarnartullu Kommune Kujllermi nersornaasigaaqqammerput. Kujataani illoqarfinni pingasuni timersortartunut nersornaasiinerit tallimanngormat tunniunneqarput.
Qaqortumi timersullammanngortut tassaapput K-33-mi nerrivimmi Arsaarartartut meerartaat. Taassuma saniatigut arnani timersullammanngorpoq Peqatigiiffik Qajameersoq, Sofie Rosa Jakobsen. Angutinilu timersullammanngorluni Paulus Jensen aamma Peqatigiiffik Qajameersoq.
- Timersortartuugussi, sungiusaasuugussiluunniit soqutigisassinnik nuannarisassinnillu aallussinissigut kommunitsinni susassaqartitsinermik, ataatsimoorluni nuannisaqatigiinnermik, maligassiuilluarnermillu tunisisarpusi. Tunniusimanissinnimi kommunitsinni uummarissaaqataavusi, tamannalu tulluussimaarutigalugulu qujassutissaraara, borgmesteri tikilluaqqusilluni oqalugiarnermini ilaatigut taama oqarpoq.
Nanortalimmi nersornaasiinerit kommunalbestyrelsimi ilaasortamit Kim Ezekiassenimut ingerlanneqarput. Taanna holditut timersullammaat, neriunaatilik, sungiusaasutsialak timersullammammillu nersornaasiivoq. Siuteroq 43 U-15 nivissat hold-itut timersullammanngorput, neriunaatilittut S-43-mi isikkamik arsaattartoq, Niels (Niilu) Hansen 13-inik ukiulik nersornaaserneqarpoq. Siueroq 43, nivissat U-15 sungiusaasuat, Jesse Anthonsen sungiusaasutsialattut nersornaaserneqarpoq. Ukioq manna timersullammattut 15-inik ukiulik Kimmernaq Kleist nersornaaserneqarpoq.
Timersullammaat, sungiusaasutsialaat, isumalluarnartutullu nersornaaserneqartut timersoqatigiiffinnit innersuussaapput.
- Taamaattumik nunaqqatigiit akornatsinni nammineq kajumissutsiminnik suliaqartut, timersortartut, maligassiuillutillu suliaqartartorpassuit akornanni maluginiarneqarlutik innersuunneqarnermikkut nersornaaserneqartussat pilluaqqungaarpakka; suliaq kusanartoq, takutitsilluarnikkullu maligassiuineq pillugu nersornaaserneqarmata, Stine Egede pilluaqqusivoq.