Malartitassaanngillat
Angutimmarik Kreutzmann klubbialu OV Helsingborg sapaatip akunnerata naanerani kingullermi ajorsareerlutik iluatsitsipput. Danmarkimi HC Fyn pakatsiffiuvoq
Sapaatip akunnerani kingullermi Västeråsimut målinik qulinik ajorsareerlutik OV Helsingborgip unammisartui arfininngornermi angerlarsimallutik Helsingborgimi Allsvenskanimi normu 9-mut Djurgårdenimut unammipput.
Angutimmarik Kreutzmannip arsaqataasalu takutikkuspaat Sverigemi pitsaanerpaanut anngunnissaminnut suli periarfissaqarluarlutik. Unamminerup aallartinnerani igisinnaartut kalaaleq nunanut allanut unammisartoq unammilluartoq takuaat. Minutsimi ataatsimi unammereerlutik Angutimmarik Kreutzmannip OV Helsingborgip isertitaat siulleq isertippaa, pigaluttuinnarporlu.
OV Helsingborgim isertitat siulliit tallimat akornanni pingasut Angutimmarik Kreutzmannip isertippai.
Unamminerup sinnerani OV Helsingborg takutitsilluaannarpoq. Piffissap ilaani unamminerup immikkoortuata aappaani unammisut qulinik siuarsimapput, nalorninaatsumillu 33-26-mik ajugaallutik. Angutimmarik Kreutzmann tallimanik isertitsivoq unammineq namminerlu unamminini naammagisimaarlugu.
- Unammiuaarnerni kingullerni ajorsarujussuarreerluta nalinginnaasumut inisseqqippugut. Uanga nammineq uissuummissutigaara taam aingerlalluartigigatta, tuigami anniaraara. Tamanna peqquteqarpoq nunatsinni minutsit 30-t marloriarlunga unammigama.
Danmarkimi kalaallit unammisartut
Sapaatip akunnerata naanerani aamma kalaallit Danmarkimi unammisartut unammipput.
Odder Håndbold Aqqaluk Sørensenilu Odderimi HC Midtjylladnimut 25-22-mik ajugaapput. Aqqaluk Sørensen ataatsimik isertitsivoq.
Jakob Larsenip HC Fynimi unammisartui Minik Dahl Høegh peqatigalugu Stoholmimut unammiartorput immaqalu tupaallaataasumik Fynimiut 23-26-mik ajorsarlutik uterput. Minik Dahl Høegh assersorluarneqaqqippoq. Holdit tamarmik 1. divisionimiittut paasisimavaat isertitsinerpaasartoq inissaqartippallaarunikku navianarsinnaasoq. Minik Dahl Høegh sisamanik isertitsivoq.
Angusat marluk kinguneraat Odder Håndboldip aamma HC Fynip inissisimaffinnik paarlaanenrat. Odder Håndbold normu 3-nngoqqippoqHC Fynilu kingumut normu 4-nngoqqilluni. Ribe-Esbjerg siuttuuvoq GOG normu 2-jusoq.