Malina ujaminnaqqikkusuppoq
Ujaminnattaani siulleq eqqaamavaa. Taanna 1995-imi pissarsiaraa, maannakkulli qassiunersulluunniit eqqaamanngilai. Ataasinngorneq aallarnerfigalugu Qaanamik pissartanngorniunnermi aamma pissarseqqikkusuppoq.
Unamminermi qanoq periuseqarnissani oqaatiginianngilaa. Malina Amundsen, Nuummioq qungujulaaginnarpoq aperineqarami suna nammineq naatsorsuutigineraa ukioq manna Qaannamik pissartanngorniunnissani Ilulissani ataasinngornermiit juulip arfernganiit arfinngorneq ilanngullugu ingerlanneqartussani.
– Uanga tamanna oqaatigerusuppallaanngilara, tassami unamisassama periusissakka paasigunikkit tamanna tunngavigalugu iliornialeqimmata, qungujulluni oqarpoq.
Tassami arnaq taanna nalinginnaasuunngilaq. Arnarmi taanna qajavissuuvoq, 1995-imili ujaminnaqqaarami tulleriaaginnarnik pissarsisarsimavoq. Maannakkulumi qanoq amerlatiginersulluunni eqqaamanngilai:
– Uanga kisitsiunnaarnikuuvunga. Immaqa 50-inik peqarpunga, oqarpoq nipaalu malillugu soorlu taakku qassiuneri apeqqutaavallanngitsut.
Kalaallit Nunaanni qaannamik pissartanngorniunnermi unammissutigineqartartut arlaliupput, ilaat tassapput qanittumut ungasissumullu parrunneq, staffet, kinngusaqattaarneq. iligiiaarluni kinngusaqattarneq, allunaaqattaarneq aamma unaamik naaligarneq.
Nuummit aqqanillit peqataassapput - peqataajartortullu kujataaniit tamarmik Sarfaq Ittumut katersuupput. Ikinngutigiaat - ataaasinngornermiillu qaannamik unammersuartussat.