Martin Møller Finlandimi oqaluttuarisaanikkut pingaartuliorpoq

Sisoraatinik oqilaniutiitigaluni ooqattaasartartoq Martin Møller ooqattaasartartut tamarmik sinnattuat aammalu manna tikillugu kalaallit sapersimasaat naammassivaa; pallungalluni nikorfallunilu ooqattaasarluaqaaq, quleriarlunilu eqqoriakkani tamaasa eqqorlugit, taamatut paasissutissiivoq Grønlands Biathlon Forbund.

Taamaasilluni Martin Møller aamma kalaallini siullersaalluni pillaammik arpatassat 150 meterit pinngitsoorpai.

Aallaariaqattaarneq ingerlanneqartarpoq uummatip tillingaatsiarnerani, minutsimut 150-180-imut tillernerani, taamaasillunilu aallaarialernermi anertikkartoqarluartaqaaq. Pallorluni eqqoriagassaq 50 meterisut ungasissuseqartarpoq nerrivimmilu arsaararnermi arsaqqaatut angissuseqarluni, nikuillunilu ooqattaasarnermi eqqoriagassaq tennisernermi arsaaqqatut angitigisarluni. Martinimut angusarissaarluarneq, sæsonimi kingullermi aatsaat iluamik sisoraatinik oqilaniutiitigaluni ooqattaasarnermik aallussilersimasumut.

Martin nr. 79-itut inissippoq, ajugaasumit 3,20 minutsinik kigaannerulluni.

– Martinip ooqattaasarnera kakkagisorujussuuvara, timersortartoqataa Uioloq Slettemark oqarpoq.

Uiloq Slettemark ooqattaasarfimmi aamma angusarissaarpoq, Martinimut angusarissaartiginngikkaluarluni.

Uilup pallungalluni ooqattaasarnermi siullermi eqqoriakkani tamaasa eqqorpai, nikorfallunili ooqattaasarnermi marloriarluni uniorluni. Uilup ooqattaasarnermini marlunni sekundinik 30-inik sivisuneruvoq nr. 81-iutullu inissilluni.

Kalaallit unammisuisa pingajuat Øystein Slettemark Lahtimi angusarissaanngeqaaq, qaammat ataaseq qaangiuttoq VM-imi ingerlalluareersimagaluarluni.

Øystein pakatsinartumik nr. 91-itut inissippoq, Martin Møllerimit sekundinik 15-inik kigaannerulluni, ooqattaasarnerli ilanngukkanni 1.50-inik Martinimit kigaannerulluni.