ujakkaarneq
Martin Mølleri pitsaanerpaaffiminiittoq
Martin Møller juullinnginnerami world cup kingullermut peqataaqqammerpoq, tamanna Toblachimi Italiami pivoq
Ujakkaartartoq Martin Mølleri weekendimi nalliuttut sioqqullugit world cupimut Italiami illoqarfimmi Toblachimi ingerlanneqartumi peqataareerluni, juullimi sulinngiffeqarnissaminut piareerpoq.
Sukkasuumik arpanneq
Arfininngornermi 1,2 kilometerimut sukkasuumik arpattoqarpoq.
- 98-nik FIS pointinik pissarsivunga, ajugaasumillu sekundinik 12-nik kingulliullunga apuullunga. Arpattartut Canadameersut, Japanimeersut aamma Polenimeersut apuuteqatigalugit. Tamanna angusarissaarneruvoq, Martin Møller oqarpoq.
Klasiskimik ujakkaarneq
Sapaatiummat 15 kilometerimut klasiskimik ujakkaartoqarpoq.
- Nalinginnaasumik isorartussuseq uannut ajornartaraluarpoq. Kisianni world cupimi aatsaat taama angusaritsigaanga. Kingulliup tulliullunga aallartittussatut normu 91-itut inissinneqarpunga, kisianni qaangeraallunga 67-iullunga apuuppunga, Italiamiut nunanut allanut unammisartuinit aamma Finlandimiumit Matti Heikkinenimit 2011-mi nunarsuarmi pissartanngortumit siullillunga apuuppunga, ujakkaartartoq oqaluttuarpoq.
Tunumoornaveersaaserani
- Ukioq manna tunumoornaveersaateqarnanga nukittornissara anguniarlugu klasiskerneq sungiusarnikuuara, taamaalillunga talikka kisiisa ajaappiakkalu arpanneq tamaat atorlugit. Tamassuma pitsaaqutigaa sisoraatit pujannerunerat. Illuanilli qummukajaakkut sivingasukkut unamminarnerujussuanngortarpoq. Toblachimi tunumoornaveersaateqarnanga arpakkama, eqqortumik aalajangertutut misigaara, Martin Møller erseqqissaavoq.
- 2014-mi OL sioqqullugu angusannit weekendimi angusakka pitsaanerupput, ajunngitsumik ingerlavunga, ilanngullugu oqarpoq.
Januaarip aallaqqaataani ukiuunerani ujakkaarnermi pingaarnersaat world cup tour ulluni qulini arfineq-pingasunik unamminertaqartoq aallartissaaq. Martin Mølleri aamma tassani peqataassaaq.