Ujakkaarnermi VM
Martin Møllerip VM-imi unammeqataaqqaarnini naammagisimaarpallaanngilaa
Kalaaleq ujakkaartartoq 15 kilometerimut VM-imi unammeqataanermini 74-itut inissippoq
Sverigemiu Johan Olsson 15 kilometerimi ujakkaarnermi nunarsuarmi pissartanngorpoq ullumi pingasunngornermi. 15 kilometerit minutsini 35-ni sekundimilu ataatsimi atorpai.
Martin Møller ajoqquseqqanini pissutigalugu aatsaat VM-imi unammeqataaqqaarpoq.
World Cupimi peqataanermini orpimmut qiteqquminik aporluni ajutoornini pissutigalugu VM-imi unamminerni siullerni peqataanngilaq.
Qitini ajornartorsiutiginngilaa
15 kilometerimut unamminermi Martin Møller 74-itut inissippoq, ajugaasumit minutsini tallimani sekundinilu 54-nik arriinnerulluni.
- Unamminermi qitera ajunngilaq. Kisianni angusarissaarpallaanngilanga ullumikkut. Unamminera tamaat sukataarpunga, naggataani qasulerlunga, Danmarks Skiforbundip aallartitaanut unammeqataareernermi kingorna oqarpoq.
Aqqut aamma naammagisimaanngilaa.
- Sisoraatit ajunngillat, kisianni aqqut masappoq unammeqataasunut ajornartorsiutaalaarluni, Martin Møller oqarpoq.