Meeqqat arsaallutik unammersualerput

Illup iluani arsaateriaatsimi futsalimi meeqqat Qeqertarsuup tunuani pissartanngorniunnissaanni iligiit 20-it peqataaniarput. Angallannikkut periarfissat pissutigalugit unammersuarneq ullup ataatsip ingerlanerani naammassineqassaaq.

Klubbit peqataasussat tassaapput Nagdlúnguak aamma I-69 Ilulissaniik, FC Raaja Qasigiannguaniik, T-41 Aasiaat aamma G-44 Qeqertarsuarmiit peqataatitaqarniarput. Unammersuarnerit aqagu arfininngornermi ullaakkut nalunaaqutaq qulingiluaniit aallartissapput.

Meeqqat misilerarpaat
Peqataasussat ukioqqortussutsinut pingasut agguataarsimapput. Nukarliit ukioq 2007 inunngortuupput angajulliit 1999-mi inunngortuullutik.

- Meeqqat ukioq naallugu illup iluani sungiusarnikuupput. Qeqertarsuup tunuani pissartanngorniunnikkut periarfissinniarpagut timersortarfiit aasaanerani matunnginneranni unammisinnaanissaannut aammalu takorusullugu arsaattartutut ineriartornerminni killiffiat takuniarlugu, Nagdlúnguami meeqqani sungiusaasoq Jonas Fleischer Sermitsiaq.AG-mut oqarpoq.

Aqagu arfininngornerup ingerlanerani unamminerit 52-it naammassineqassapput futsalimi malittarisassat malillugit unammisoqassalluni. Unamminerit minutsit tallimat marloriarlugit sivisussuseqassapput.

Linki ataaniittoq toorlugu finalertoqarnissaanut pilersaarut takusinnaavat.