Meeqqat iligiiaartut 16-it kuultinnanniarnissaminnut piareerput

Polar Seafood Super Cup 2024-mi U11-t arsaattartut unammiuaarnerat ullumi sisamanngornermi Nuummi ingerlanneqartussami iligiit tamarmik tikissimalernissaat naatsorsuutaavoq.

Unammiuaarnerit tallimanngorpat nalunaaqutaq 13.00 Inussivimmi aallartissapput, sapaatiuppallu pissartanngorniutivinneq aallartissasoq naatsorsuutigineqarpoq.

- Pisussaq aaqqissuullugu unamminarlunilu nuanneqaaq, meeqqammi 192-nit ikinnerunngitsut sungiusaasullu 48-it peqataassapput, uagullu meeqqanut sungiusaasunullu misigisaq ineriartornartuutinnissaa aammalu nuannersuunissaa akisussaaffigisussaavarput, B-67-ni U11-ni sungiusaasut oqaluttuarput.

KAK-p siulittaasuata Kenneth Kleistip aaqqissuussineq kattuffiup peqataaffigisaa nuannaarutigaa, Kalaallit Nunaannilu meeqqat U11-ni unammiuaarnerat annerpaajusoq tusagassiuutinut nalunaarummi ilisimatitsissutigalugu.

Unamminissamut piareertut

Unammiuaarnermi iligiit katillugit 16-it imminnut unammissapput.

Taakkua tassaapput:

• B-67 Nuummeersoq - iligiiaat pingasut
• NÛK Nuummeersoq
• GSS Nuummeersoq
• IT-79 Nuummeersoq
• S-43 Nanortalimmeersoq
• K-33 Qaqortumeersoq
• N-85 Narsameersoq
• K-37 Maniitsumeersoq
• SAK Sisimiuneersoq
• S-68 Sisimiuneersoq - iligiiaat marluk
• T-41 Aasianneersoq
• N-48 Ilulissaneersoq
• UB-68 Uummannameersoq

Unammiuaarnerit Inussivimmi ulluni februaarip 16-ianit 18-anut ingerlanneqassapput.

- B-67-mi siulersuisuniit meeqqanut unammersuartitsinissamut aaqqissuussamut angisuumut malinnaanissatsinnut qilanaarpugut, uagummi upperaarput arsarneq arsarneriinnaanngitsoq kisiannili aamma inuiaqatigiinni kateritsitsillunilu nukimmik angisuumik tunisisartoq nuannaarutigaarpullu meeqqat allaat 11-it inorlugit ukiullit tamassuminnga misigitissinnaagatsigit, B-67-mi siulittaasoq Jimmy Holm Jensen taama oqarpoq.

Unammiuaarneq Polar Seafood Super Cup 2024-p quppernerani malinnaavigisinnaavat.