Milan Mathæussen Avannaata Qimussersuani ajugaavoq
Qimusserluni sukkaniunnermi Milan Mathæussen Ilulissaneersoq ajugaavoq.
Arfininngornermi nal. 13 Avannaata Qimussersua Sisimiuni aallartippoq.
Sukkaniunneq Uummannami ingerlanneqartussaagaluarpoq, kisiani KNQK-p qaammatip siuliani sukkaniunnissaq nuunniarlugu aalajangiuppaa, silap allanngoriataarnerani Uummannap eqqaani siku qajannarsinera pissutigalugu.
Avannaata Qimussersua ukiuni 35-ni nalliuttorsiorpoq, nalliuttorsiornerlu Uummannami pisussaagaluarpoq, illoqarfimmi tassani siullermeerluni sukkaniunneq ingerlanneqarnikuummat.
Qularnaatsumik ajugaasoq
Arfininngornermi qimussit 30-t Sisimiuni aallarfissami piareersimapput, seqinnarimmilu allaaqqissumi aqqutissamikkut ingerlapput.
Sukkaniunnermi Milan Mathæussen Ilulissaneersoq ajugaavoq. Ajugaasup tulliani siulliungaatsiarluni apuuppoq, isiginnaariallu assut qiimmattarput.
Kaali Lund Mathæussen ajugaasup tulliatut inissippoq, qimussertut allanit pingasunik malitseqarluni; Jonas Kristensen, Ilannguaq Berthelsen aamma Thomas Thygesen.
Aaqqissueqataasoq eqqissiallattoq
Qimusseq Sisimiuni siulittaasoq, Susanne Berthelsen, qimussimik sukkaniunnissamut piffissap kingulleq atorlugu nuunneqartumut piareersarluni ulapputtoqarsimasoq, Sermitsiaq.AG-mut oqaluttuarpoq.
- Uummannami siku malinnaaffiginikuuarput. Malinnaaffigaarput maanilu ingerlanneqarnissaa upperalugu, kisianni pisortatigoortumik nalunaarutigineqarnissaa utaqqinikuuarput.
- Ulluni kingullerni suliaq annertuvoq, Susanne Berthelsen, aaqqissuinerup kingorna eqqissiallattoq oqarpoq:
- Eqqissiallaqaanga naammagisimaarinnillungalu, taanna oqarpoq.
Peqataasut tikittup kingulliut tikinneranit arlaannik maalaaruteqarnissaminnut akunnerni marlunni periarfissaqartut, Susanne Berthelsen oqaluttuarpoq.
Maalaaruteqartoqarnera pissutigalugu allanngortoqassanngippat, Avannaata Qimussersuani 2023-mi siulliit qulit ima inissipput:
- Milan Mathæussen, Ilulissat
- Kaali Lund Mathæussen, Ilulissat
- Jonas Kristensen, Inaarsuit
- Ilannguaq Berthelsen, Ilulissat
- Thomas Thygesen, Saattut
- Zakorat Zeep, Qeqertarsuaq
- Otto Kristensen, Inaarsuit
- Minik Olsvig Svendsen, Ilulissat
- Marius Inûsugtok', Sisimiut
- Tittus Broberg, Saqqaq
Najoqqutaq: KNR
Facebookimi Naalakkersuisut siulittaasuata ullormi ajugaasoq pilluaqquaa: