Minik Dahl Høegh GOG-mut
Sapaatip akunnerini kingullerni isumaqatigiinniarnerit kingorna assammik arsartartoq ukiuni marlunni isumaqatigiissuteqarfigineqarpoq
Minik Dahl Høegh ukiuni marlunni peqanngereerluni GOG-imut utissaaq, klubbi 2010-mi akiliisinnaajunnaarmat qimassimallugu.
Tamatuma kingorna Minik Dahl Høegh sæsoni ataaseq Frederica Håndbold-imi unammisartuuvoq, sæsonip 2011-12-ip aallartinnissaa sioqqullugu HC Fyn-imut nuunnginnermini. Minik Dahl Høegh sæsonimi naammasseqqammersumi ingerlalluartorujussuusimavoq qallunaallu 1. divisionianni isaatitsinersaalluni.
Ajoraluartumik HC Fyn ingerlaqqinnissaminut aningaasassaaleqivoq. Sæsonip naammassinerata kingorna klubbip akiliisarnini unitsippaa.
Minik: toqqaaneq pissusissamisoortoq
Odensemi najugaqarluni GOG Fynip kujataani Gudme Arenami unammisarfilik Minik Dahl Høeghimut toqqagaavoq pissusissamisoortoq. GOG sæsonip aallartinnginneranili Minik Dahl Høeghip klubbimut pisinnissaa soqutigisorujussuusimavaa - maannalu tassa iluatsippoq.
-Isumaqatigiissutip inissinneqarnera ajorinngeqaara, aallartinnissannullu qilanaartorujussuuvunga, Minik Dahl Høegh Sermitsiaq.AG-mut oqaluttuarpoq.
- Klubbinit allanit soqutiginnissimaneq nuannaarutigalugulu tulluusimaarutigaara. Minnerunngitsumik tyskit franskillu klubbiinit saaffiginnissutit. Soorunami Tysklandimi klubbimi angisuumi unammisartuuneq pissanganassagaluaqaaq, maannakkorpiarli GOG-imi unammisartuunissaq toqqaaneq eqqortuuvoq, neriunartumillu klubbi Håndboldligamut uterteqataatissavara.
GOG-ip sæsonimi aggersumi qaffannissaq pimoorullugu anguniarpaa. Sæsonimi naammasseqqammersumi iluatsitsingajassimavoq, klubbi arlalinnik ajutoortoqarluni qaffanniulluni unamminermi kingullermi TMS Ringstedimut ajorsarami.
Klub anguniagaqarluartoq
GOG-p pisortaata unammisartuutigisup anguniakkat annertuut isertuutinngilai.
- Minik Dahl Høeghip, sivisuumik unammisartorilissallugu kissaatisimasatta, sakkortusissutit allat peqatigalugit GOG Håndboldliga-mut uterteqataatissavaa, oqaluttuarisaanitsigut pissusissamisoortumik tassani inissisimasussaagatta.
GOG-ip sponsorii marlunngorpat ualikkut ataatsimiinnermi Minik Dahl Høeghimik isumaqatigiissuteqarnermik paasitinneqassapput. Minilli nammineq peqataassanngilaq nunanut allanut unammisartut Vejlemi katersuunneranni peqataassagami.