Minik Dahl Høegh Sverigemiiginnassaaq

Minik Dahl Høegh Amo Handbollilu imminnut nuannariingaaramik isumaqatigiissut ukiumik ataatsimik ilallugu 2025-p aasaata tungaanut sivitsorpaat.

Minik Dahl Høegh, ukioq manna 39-nik ukioqalertussaq, sæsonimi 2021/22-mi Danmarkimi assammik arsartartut unammisartoqatigiivinit TMS Ringstedimit klubbimut nuuppoq, Sverigemiinninilu nuannaarutigalugu isertuutinngilaa.

Sverigep kangiani illoqarfimmi mikisumi Alstermomi 1000-it inorlugit inulimmi, Kalmarimit 70 kilometerisut ungasitsigisumiittumi, Amo Handball inissisimavoq. Københavimit akunnerit pingasut affarlu biilerluni ungasitsigipajaarpoq.

Klubbi sæsonip siuliani Sverigemi assammik arsartartut pikkorinnersaannut HANDBOLLSLIGAEN-imut siullermeerluni qaffappoq. Qaffanneq Minik Dahl Høeghip annertuumik peqataaffigaa. Maannakkut klubbi klubbinit 14-iusunit normu 10-tut inissisimavoq. Taamaammat sæsonip sinnerani sungiusaasutaaq peqatigalugu ligamiiginnarnissaq sukataarutaassaaq.

Minik Dahl Høegh Sverigemi arsaattartut utoqqaanerpaat tulliattut inissisimavoq.

VM-imik takorluugaqarneq

- VM-imut anngunnissaq ukiorpassuarni anguniagaraara. 2001-imi siullerpaamik kalaallit Frankrigimi VM-imi unamminerat takugakkuli tamanna takorluugariuarpara. Taamatut takorluugaqarsimanngitsuuguma assammik arsartartutut inuussutissarsiuteqarunnaareersimassagaluarpunga, Minik Dahl Høegh oqaloqatigigatsigu oqaluttuarpoq.

Sungiusaasoq Johannes Groth siulersortigalugu angutit nunanut allanut unammisartut ulluni makkunani Ikastimi katersuussimapput, nunarsuarmi pissartanngorniunnissamut anngunniunnissamut piareersarlutik. Unammersuarneq pilersaarutit malillugit maajimi ingerlanneqassaaq. Sumi unammersuartoqassanersoq suli aalajangerneqanngilaq.

- Nalunngilara anngutissagutta suut tamarmik ingerlalluartariaqartut. USA, kingullermik VM-imi peqataasimasoq, ajugaassangatinneqaqqikkunarpoq.

- Tamatumunnga tunngatillugu anersaarululerpunga, Minik Dahl Høegh oqarpoq nangillunilu:

- Neriuppunga qanittukkut Minik nutaaq uannik paarlaasussaq tikiukkumaartoq, taamaalillungalu uanga arsartuunanga siunnersortaasinnaaniassagama.

Sakkortuumik isertitseriartartoq

Minik Dahl Høegh ukiorpassuarni assammik arsartartutut pikkorissutut unammisartuusimagaluarluni sakkortuumik isertitseriarsinnaanerminik attassiinnarnera assammik arsartartut akornanni tupigusuutigineqaqaaq.

Klubbini allani Miniup unammisartuuffigisimasaanitulli Amo Handbollimi aamma strafferluni isertitseriartartuuvoq.