Naggataarneq pissanganartoq
Nuummi illup iluani arsaalluni illoqarfimmi pissartanngorniunnermi angutit isertitseriaqattaarput ajugaasussarsiorlutik. Inernerit takukkit.
B-67 hold 1 aamma B-67 hold 2 illup iluani arsaalluni illoqarfimmi pissartanngorniunnermi Greenland Venturemi finalimi unammipput. Unammineq naammassimmat naligiiginnarlutik 0-0-erput taamalu isertitseriaqattaartariaqarlutik. B-67 hold 1 finalimi 2-1-imik ajugaavoq.
ALLAASERISAQ ATUARUK: NÛK aallartilluarpoq
Arnani NÛK hold 1 aamma NÛK hold 2 finalimi unammipput, tassanilu NÛK hold 2 3-1-imik ajugaavoq. Angutini inuusuttuaqqani B-67-ermiuinnaat unammipput, tassani B-67 hold 2-p B-67 hold 1 ajugaaffigalugu 1-0-imik.
Oldboysini finalerput B-67 hold 1 aamma NÛK hold 1. B-67 2-1-imik ajugaavoq.
Illoqarfimmi pissartanngorniunneq Nuk Firma Fodbold-imit aaqqissuunneqarpoq, taannalu ukiut tamaasa silami suliffeqarfinnik unammersuartitsisarpoq. Illoqarfimmi pissartanngorniunnermi sinneqartoorutit Haiti-mi nunap sajunneranik eqqorneqartunut tunniunneqassapput.
– Tamatuma saniatigut unammiuaarneq angutit arnallu illup iluani nunatsinni pissartanngorniunnissaannut piareersarnertut isigineqarpoq, GM-ilu ingerlanneqassaaq februaarip naalernerani. Unammiuaarneq aamma inuusuttuaqqanut Arctic Winter Gamesimi peqataasussanut aamma piareersarnertut isigineqarpoq, taamatut paasissutissiivoq Nuuk Firma Foldbold.
– Unammiuaarneq ingerlalluarsimavoq, unamminerit nuannersorpassuit isiginnaarpavut. Aamma illup iluani sinaakkutaqanngitsumi arsaanneq ilinniarfigilluarparput. Misilittakkat tamakkua Kalaallit Nunaanni Arsaattartut Kattuffiannik aveqatigissavagut, siunertaralugu GM sioqqullugu ajornartorsiuteqalaassagaluarpat tamakkua paasiniarnissaannut, Nuuk Firma Foldbold allappoq.
ALLAASERISAQ ATUARUK: Aamma arsaattartut Haiti ikiorpaat