Niviaq Danmarkimi pissartanngorpoq
Ullormi siullermi nunatsinnut kuultinnanngilaq,silvinnallunili bronzennappoq. Ullulli aappaani Niviaq Chemnitz Berthelsen pissartanngorpoq
Ujakkaarnermi juniorini U-23-nilu nunarsuarmi pissartanngorniutereerlutik ujakkartartut Norgeliarput tassani uani sapaatit akunnerani Danmarkimi pissartanngorniullutik. Nunanut allanut unammisartut saniatigut Nuummi NUP-miit ujakkaartartut sisamat Aasianniillu ASp-miit marluk peqataapput.
Ullormi siullermi pissartanngortoqanngilaq. Angutinili silvinnattoqarlunilu bronzennattoqarpoq. Danmarkimiit Lasse Hulgaard ajugaavoq, Karl-Peter Kristensen silvinnalluni nunanullu allanut unammisartut sungiusaasuat bronzennalluni.
Arnani Pipalik Kristensen bronzennappoq. Niviaq Chemnitz Berthelsen Danmarkimi pissartanngorniarnermi ullormi siullermi unammeqataanngilaq.
Ullut aappaanni angutit 14,4 kilometerlutik unammineranni arnallu 10.8 kilometererneranni ilimagisatut ingerlasoqarpoq. Lasse Hulgaard aamma Niviaq Chemnitz Berthelsen nalorninaatsumik ajugaapput. Lasse tulliminut minutsinik marlunnik siulliuvoq, Niviaq tulliminut Signe Schølerimut minutsinik tallimangajannik siulliulluni.
Uani sapaatit akunnerani tamarmi Danmarkimi pissartanngorniunneq nangissaaq.