Nordic Cup: Ajorsarujussuarneq naligiinnerlu
Kalaallit Nunaanni angutit futsalimik nunanut allanut unammisartui Nordic Cupimi Hjørringimi ingerlanneqartumi marlunngormalli unammisaqattaarput. Ullumi unammissanngillat, inissinniunnermili unammisassatik kikkuussanersut ullumi paasivaat.
Angut futsalimi nunanut allanut unammisartut Nordic Baltic Cupimi, Danmarkimi Hjørringimi ingerlanneqartumi sapaatip akunnerani uani peqataapput.
Marlunngormat unammeqqaaramik Danmarkimut unammipput, ajorsarujussuarlutilli. Danmark arfineq-pingasoraartoq, Kalaallit Nunaat ataasiaannarluni isertitsivoq.
- Periarfissaqartaraluarpugut, atorluanngitsoorlutigilli. Unammineq sungiusimasatsinnit ilungersunarneruvoq, piareersimanerunissarlu aamma amigaatigisimavarput, sungiusaasoq René Olsen oqarpoq.
René Olsenip erseqqissarpaa Danmarkimi angusat angutit piginnaasaannut tulluanngikkaluartut, inerneralu allaanerusimasinnaagaluartoq.
Unamminerup aappaani naligiittut
Kalaallit Nunaat Norgemut pingasunngornermi unammimmat, angusat kusanarnerungaatsiarput. Norskit unammillerneqarluarput, unamminerlu naligiiffiulluni 2-2-mik inerneqarpoq.
- Norgemut timikkut suliassatsinnullu piareersimaneruvugut, taamaasillutalu peqataalluarsinnaanerput aamma takutipparput. Iluatsitsinerulaarsimasuugutta unammineq ajugaaffigalugu 3 pointinnassimassagaluarpugut, unamminerup inernera pillugu oqarpoq.
Eqimattakkaarluni unamminerit kingulliit ullumikkut ingerlanneqarput. Tassa Letland Litauenilu unammillutik kiisalu Danmark Norgelu unammillutik. Ullumi unamminerit inerneri aallaavigalugit Kalaallit Nunaata, inissinniunnerni unammisassatik, arfininngornermi sapaammiluunniit pisussat, paasissavaat.