Norgimiut 15-it Nuuk Marathonimut
Arnat angutillu Nuuk Marathonimi nutaanik pissartaartaqariaqassapput. Pissartaasut isorartunerpaamut arpaqataanatik marathonip affaanut peqataassaammata.
Arpattartut ilisimaneqaqisut Nuuk Marathon arfininngorpat aggustip 25-ani pisussamut qanoq isorartutigisumut arpassallutik nalornisupilussuupput. Amerlanerit New York Marathonimut peqataanissartik pissutigalugu Nuuk Marathonip affaannaanut, 21 km-erimut peqataaniarput. Nunarsuarmi marathonimik aaqqissuussat annersaannut New York Marathonimut peqataanissaq aanaaralaarsuuvoq. Kalaallit Nunaat 20-nik New York Marathon-imi peqataatitaqarsinnaasutut aaqqitaavoq. Qasuersaarnissamut sapaatip akunneri qulit naammanngitsut peqataaniartut arlallit taama isumaqarput.
Nuuk Marathon aggustip 25-anut pisussangorlugu aaqqinneqarneranut pissutaavoq arpattartut nunanit allaneersut angalanissaat Air Greenlandikkut akikillisaavigineqarsimammat, Nuuk Marathonimi aaqqissueqataasoq Kim Godtfredsen oqarpoq. Angalanissamut akikillisaavigineqartut ilaat tassaapput norgimiut 15-it allallu Danmarkimeersut, Italiameersut USA-meersullu.
– Qaqugukkut arpatitsisassalluta nalilersortariaqalerparput, Kim Godtfredsen oqarpoq.
Nuuk Marathonimut peqataanissamut nalunaarfissaq kingulleq tassaavoq arfininngorneq nal. qulingiluat. Katuap eqqaanit arpattut nalunaaqutaq qilinut aallassapput.
Sermitsiami arpanissaq pillugu allaaserisaq atuaruk.