Nukappissat nuannersumik angalaqqammersut
Arsaattartut 16-it Upernaviup eqqaaneersut Danmarkimi angalapput iluatsitsiviulluartumik.
Danmarkimi sapaatit akunnerini marlunni misigisaqaqalutik sungiusarsimaqalutillu nukappissat 16-it angalaqataallu Kalaallit Nunaannut uteqqipput angalaneq soqutiginartoq kulturikkullu pissarsiffiusoq naammassereerlugu. Upernaviup eqqaani nunaqarfiit angalaartitaqarput Kullorsuaq minillugu.
Nukappissat 16-it 14-iniit 24-nut ukiullit, aqutsisui angalanissamillu piviusunngortitsisoq atuarfiup pisortaata tullia Tekle Ghebrelul Danmarkimiinnerminni arsaattartut peqatigiiffiata Odense KFUM-ip illuutaani Odensemiittumi najugaqarput. Unnukkut madrassit saqqummerneqartarput soorluli lejrskoliinnartartut.
Tekle Ghebrelul, angalanissamik piviusunngortitsiniarluni sulisimaqisoq oqaluttuarpoq angalaneq piviusunngorsinnaasimanngitsoq ikiuuttut taama amerlatiginngikkaluarpata. Soorlu Upernavik Seafood piviusunngortitsiniaanermi aningaasatigullu tapersiivoq.
Upernavimmi sunngiffimmi sammisassaqartitsivik, Odense Kommune, aningaasaateqarfiit assigiinngitsut, Kalaallit Illuutaat Odensemiittoq tamarmik pilersaarutip piviusunngortinneqarnissaanut tapersiipput, Upernavimmi aningaasanik katersiniarluni tusarnaartitsisoqartartoq. Nukappissat tamarmik 5.000 koruuninik akiliipput Tekle Ghebrelul akissarsiaqarani atorfimminiit sulinngiffeqarpoq. Angalanermi aningaasartuutitut 250.000 koruunit naatsorsuutigineqarput.
– Angalanerup siunertaraa nukappissat misigisaqarnissaat aammalu takutikkusullugit allami periarfissaqartoq kiisalu takorluukkat anguneqarsinnaasut ilungersorluni suligaanni. Soorunami aamma paasitikkusupparput Upernaviup silataani silarsuaqartoq, Danmark ilisimasaqarfiginerussagaat angorusupparput, danskit oqaasii minnerunngitsumillu arsamik sungiusarneq arsaannerlu. Nukappissat sisamaannaat siornatigut Danmarkimissimapput, Tekle Ghebrelul naammagisimaarinneqisoq oqaluttuarpoq.
Timersornikkut angusat aamma kusanarput. Arsaanneq kusatsivippoq. Odensemi KFUM-imi arsaattartut aappaat unammeqqaarneqarmata 8 - 1-mik ajorsarujussuarput FC Nanok Københavnimiit unammineqarmat 6 - 5-imik ajorsarput.
U19-imik arsartartut ilaannut unamminermi 4 - 3-mik ajugaapput unamminermilu kingullermi Odense KFUM kingumut unammeqqinneqarput, Upernavimmiullu nukappissat arsaaffik nuannaaqalutik qimappaat 6 - 3-imik ajugaagamik.
– Nuannersorujussuuvoq, 19-inik ukiulik Johan Bistrup Tasiusameersoq oqarpoq. Johan Bistrupip nukappissallu sinneri 15-it arsaannerit pissanganangaartut puigorallartussaanngilaat, namminneq arsaannitik aammalu superligami arsaannerit OB - AaB aamma FCK - Esbjerg isiginnaariakkatik aammalumi kulturikkut pissarsiatik soorlu H. C. Andersens Hus Odensemiittoq pulaarnermit eqqaamasassat.