Nuna tamakkerlugu sungiusaasoq: Iligiit marluinnaat GM-imut sungiusarluarsimapput
Angutit assammik arsaallutik nunanut allanut unammisartut sungiusaasuata Ingi Olsenip nunatsinni pissartanngorniutivittoqarnerani piareersarluartoqarsimannginnera uggoraa
Ingi Olsen angutit nunanut assammik arsaallutik nunanut allanut unammisartuinut sungiusaasup ulluni makkunani Nuummi assammik arsaalluni pissartanngorniutivinnerit malinnaavigisimavai.
Maannangaarlu takusinnaalersimavaa angutit pissartanngorniutivinnerini iligiit marluinnaat takutitsilluartut.
- Peqatigiiffiit arlallit piareersarluarsimanatik GM-imut peqataanerat uggorilaarpara. GSS-iminngaanneersut Norsaq HC-minngaanneersullu unammisartut kisimik takutitsilluarput. Unammeqataasut sinneri malunnartumik piareersarluarsimanngillat. Taamaattoqartilluguli unammisartut nunanut allanut unammisartut katersuutinneqarnerini pitsaassutsimut sunniuteqartarpoq, taanna Sermitsiaq.AG-mut oqarpoq.
Sungiusaasunik pikkorissaanernik ujartuisoq
Taamaammat taakku iligiit sungiusarluarsimallutik pissartanngorniutivinnermi angusarissaarnerat nuannaarutigaa.
- Ukiunimi kingullerni arfineq-pingasuni takusariikkatsitut GSS nukittunerpaapput. Norsaq HC-llu unammisaminniik mikinerungaluarlutik akersuutillaqqinnerat nuannerpoq. Piareersarluarsimallunili GM-eqataanissaq ajornanngitsuaraavoq.
Taamaammat nuna tamakkerlugu sungiusaasup nunatsinni sungiusaasunik amerlanerusunik pikkorissaasoqarnissaa ujartorpaa.
- Unammisartummi arlallit ukioq kaajallallugu sungiusarluarsimasut takuneq ajorpagut. Amerlanerusunik sungiusaasunik pikkorissaanikkut unammisartut amerlanerit sungiusarnissamut soqutiginnilersinneqarsinnaapput. Taamaaliortoqaraluarpat timersuummut iluaqutaassangaluaqaaq, Ingi Olsen oqarpoq.