Nunanit tamalaanit peqataaffigineqartumik unammiuaarnermi Slettemark inissilluarpoq
Sisoraatinik ooqattaasartartoq Sondre Slettemark sapaatip-akunnerata naanerani Polenimi nunanit tamalaanit peqataaffigineqartumik unammiuaarnermi angusarissaarpoq.
Sapaatip-akunnerata naanerani ooqattaasartartoq Sondre Slettemark Polenimi IBU Jr. Cupimi peqataavoq, tassanilu arpattartut 120-t Europameersut, USA-meersut Asiameersullu unammivai.
Arfininngormat 10 kilometerimut arpannermi kalaaleq arpattartoq aatsaat taama angusarissaartigaaq, taama Kalaallit Nunaanni Biathlonertartut Kattuffiat ilisimatitsivoq.
Sisoraatinik oqilaniuttartut tamarmik akornanni piffissaq pitsaanerpaap pingajuattut inissippoq, ooqattaasarnermilu marloriarluni uniorpoq, taamaalillunilu Estlandimiup, Østrigimiup Slovakiamiullu kingorna normu 4-tut inissilluni. Ooqattaasartut nunanit nukittuneersut, soorlu Tysklandimit, Italiamit Tjekkiamiillu peqataasut tamarmik Sondremit ajugaaffigineqarput, kattuffik allappoq.
Silarsuarmi pikkorinnerpaat angungajakkai
Sondre 19-inik ukioqarluni aamma U-23-ni inuusuttut akornanniippoq:
- Soorunami angusaq naammagisimaarluinnarpara, aali arpannera pitsaanerpaajunngikkaluartoq. Eqqarnera pitsaanerusinnaagaluarpoq (quliusunit arfineq-pingasut eqqorpakka). Sisoraatinik oqilaniuttarfimmi ingerlalluarpunga, sungiusarluarsimaqaangalu!
- Ujaminnattarfimmut inissinnissannut sekundit quliinnaat amigaatigaakka! Nuannaarutigaarali nunarsuarmi pikkorinnerpaat akornanniillunga takusinnaagakku, naammalluinnartumik naammalluinnangajattumilluunniit ujakkaaruma ujaminnassinnaallunga, sisoraatinik ooqattaasartartoq inuusuttoq oqarpoq.
Sisamaattut inissilluarnerup saniatigut 15 kilometerisut arpannermi arfineq-pingajuattut inissippoq eqqoriagassat sisamat eqqorlugit, sapaatiummallu sisoraatinik oqilaniunnermi 18-itut inissilluni.