angusaqarluarniarneq
Nunanit tamanit peqataaffigineqartunik Nuummi timersornikkut aaqqissuussinerit
Timersornermut siunnersuisoqatigiiffik peqatigalugu Nuuk timersornermik aallussaqalerpoq
Ukiuni aggersuni timersornikkut eventsinik sisamanik annerusunik Nuummi ingerlatsisoqarnissaanut pilersaaruteqartoqareerpoq, kisianni anguniakkat suli annertunerupput.
Tassami Kommuneqarfik Sermersuup Sports Event Nuuk pilersinneratigut, illoqarfittut timersornikkut eventsinik aaqqissuussinernik ineriartortitsinernillu pilerinarnerit ilaattut malunnaateqalerniarpoq.
- Takorloorneqartoq tassaavoq illoqarfik asseqanngitsunik pisoqartitsiffiusartussaq eqeersimaarfiusoq pilersissallugu, naleqassutsimik qaffariartornermillu pilersitseqataaffiusumik. Aamma Nuuk nunatsinni (tamat) akornanni timersornikkut pisoqartitsiviusartutut ilisimaneqassaaq, kommunimi Meeqqanut, Ilaqutariinnut Atuarfeqarnermullu Ataatsimiititap oqaluuserisassaani tamanna atuarneqarsinnaavoq.
Anguniakkat Kommuneqarfik Sermersuup illoqarfiit annersaattut periusissiaanit aallaaveqarput, tassanilu nuanit tamanit peqataaffigineqartunik timersornikkut aaqqissuussinerit salliunneqarput, tamannalu sport eventkoordinatoritut atorfilimmik atorfinitsitsisoqarneranik kinguneqareerpoq.
Atuaruk: Illoqarfiit pingaarnersaat pillugu periaasissaq
Kommuni maanna Sport Event Nuuk akuerineqarnissaanik kiisami inassuteqarpoq, taanna 300.000 koruuninik immikkoortitsivigineqarluni Nuuk illoqarfik eqeersimaarfiusutut peqqissutullu nittarsaassissaaq.
Sport Event Nuuk timersornerup silarsuaani suliaqartunut pioreersunut qanimut suleqateqarnissaa kissaataavoq, taamaattumillu timersornermut siunnersuisoqatigiit peqataasarnissaat naatsorsuutigineqarpoq.
- Sport Event Nuuk ikorfartorniarlugu siunnersortarniarlugulu innersuussutigineqarpoq, Timersornermut Siunnersuisoqatigiit tusarniaaffiusartussatut tassunga atatinneqarnissaat, taamaaliornikkut qulakkeerneqassalluni, Nuummi nunanit tamalaanit peqataaffigineqartumik eventeqartitsinerit pilersinneqarnissaat ineriartortinneqarnissaallu, namminersorlutik aaqqissuussisartut peqatigiiffiillu ingianngikkaluarlugit, oqaluuserisassani tamanna atuarneqarsinnaavoq.