Nunanut allanut unammisartunut sungiusaasoq: Kalaallit arsaattartut siuariarujussuarsinnaapput
Ukiuni aggersuni arsaanneq siuariarujussuarsinnaavoq, nunanut allanut unammisartut sungiusaasuat oqarpoq. Unammisartunut A-nut eqaannerusumik arsariaatsimik nutaamik saqqummiinissaminut piareerpoq – arsaannermullu annertuunik takorluugaqarluni.
Nuummi tallimanngornermi ullaaralaavoq. Morten Rutkjær iteqqammerpoq. Ulluni makkunani nunanut allanut unammisartunik katersuutsisimavoq, pisussarpassuuppullu. Aningajalerpoq, ullullu sinnera arsaannermut tunngassaaq, aviisi AG allappoq.
Taamaattoq tv-mik isiginnaalaarnissamut piffissaqartariaqarpoq. EM-imi nuannannerup nalaani soorunami nunanut allanut unammisartunut sungiusaasoq unamminernit nuannersunit misigissuseqarfioqisunillu tiguartissimavoq. Ippassaamagu unnukkut Danmark Finlandimut ajorsareernerup kingorna Christian Eriksen ivigaaqqani aqullaareersoq Belgiamut unammilluartoq takoreersimavaa.
Qallunaat naluneqanngitsutut Kevin De Bruynemut ilaanullu 2-1-mik ajorsarput, taamaattorli kingullertigut pitsaanerpaamik unamminerip immikkoortuanik takutitsillutik.
- EM-imi arlaatigut immersorneqarpit?
- Ilaanarujussaq, Morten Rutkjær oqarpoq.
Unammisartorisatta illersuisinnaanerulernissaat tiguartiffigisimaqaara. Taamaattumik nutaamik periuseqalissaagut. Nalinginnaasumik kalaallit 4-3-3 (illersuisut 4, qeqqaniittut 3, saassussisullu 3) atorlugu unammisarput. Tamannali eqaannerusariaqarpoq. Taamaattumik unammisartut pakasalaarlugit 5-3-2-mik unammeriaaseqassaagut, taamaaliorluta backit tallimat illersortigalugit.
- Illersorniarpalunngila?
- Aap, kisianni arsaq tigugaangatsigu 3-5-2-mut nuussinnaassaagut. Tamanna arsaannitsinni oqimaaqatigiissilluassaaq; oqimaaqatigiinngilaarsimavoq, Morten Rutkjær oqarpoq.
Allaaserisaq tamaat uani AG-mi atuaruk: